Almaty qalalyq ákimshilik polısıasynyń málimetinshe, 9 myńnan astam azamattyq qarý ıesi tekserilgen.
99 zańdy tulǵa, onyń ishinde 6 mamandandyrylǵan dúkende saqtaý sharttary men tirkeý erejeleriniń saqtalýy, qyzmettik qarý men olarǵa arnalǵan patrondardyń qaıta resimdelýi tekserildi, dep habarlaıdy Almaty-akshamy.kz Polisia.kz-ke silteme jasap.
«Esterińizge sala keteıik, tıisti qoǵamdyq tártipti saqtaý, atys qarýyn qoldanýmen baılanysty qylmystardyń aldyn alý jáne jolyn kesý, sondaı-aq azamattyq jáne qyzmettik qarý aınalymyna tıimdi memlekettik baqylaýdy júzege asyrý maqsatynda qalada 27 aqpan men 10 naýryz aralyǵynda jalpyrespýblıkalyq «Qarý» jedel aldyn alý is-sharasy ótkizilip jatyr. Azamattyq jáne qyzmettik qarý aınalymyna tıimdi memlekettik baqylaýdy qamtamasyz etý boıynsha belgili bir sharalar qabyldandy», – dedi Almaty qalalyq PD ákimshilik polısıa basqarmasynyń bastyǵy Asqat Qulbaev.
Onyń aıtýynsha, qarýdy saqtaý sharttary men tirkeý, qaıta tirkeý erejelerin buzýdyń 486 deregi anyqtaldy, nátıjesinde QR ÁQBtK-niń 484-baby jáne QR ÁQBtK-niń 486-baby boıynsha 482 jeke menshik ıesi jáne 4 zańdy tulǵa ákimshilik jaýapkershilikke tartyldy. Anyqtalǵan zań buzýshylyqtar joıylǵanǵa deıin 358 birlik tirkelgen qarý tárkilendi. Sonymen qatar jedel aldyn alý is-sharalar bastalǵannan beri tirkelmegen qarý-jaraqtyń 61 birligi, jarylǵysh qurylǵynyń bir birligi, myltyqtan 670 patron, tegis uńǵyly qarýdan 143 patron, travmatıkalyq qarýdan 11 patron, bes birlik sýyq qarý, 9 granata jáne 276 elektroshokerler zańsyz aınalymnan tárkilendi. QR QK-niń 287-baby boıynsha tirkelmegen tegis uńǵyly, gaz-travmatıkalyq jáne gazdy atys qarýyn zańsyz saqtaý deregi boıynsha barlyǵy 27 qylmystyq is jáne QR QK-niń 482-baby boıynsha alty ákimshilik is qozǵaldy.