Almaty polısıasy Jetisý oblysynyń turǵynynan qańtarda urlanǵan qarýdy tárkiledi, dep habarlaıdy Almaty-akshamy.kz Polisia.kz-ke silteme jasap.
Qarý-jaraq dúkenine jasalǵan shabýylǵa qatysqan Jetisý oblysynyń 26 jastaǵy turǵyny ustaldy. Kúdiktini ustaý boıynsha arnaıy is-sharany Esirtki qylmysyna qarsy kúres basqarmasynyń qyzmetkerleri men polısıanyń arnaıy jasaǵy júrgizdi.
«L. esimdi azamatty jeke tintý barysynda qarý-jaraq dúkeninen qańtardaǵy tártipsizdik kezinde urlanǵan tapansha tárkilendi. Mamandandyrylǵan sot ruqsat bergen tintý barysynda kúdiktiniń úıinen tapanshanyń qaby tabyldy jáne tárkilendi. Sonymen qatar ustalǵan adamnyń Jetisý oblysy Qaratal aýdanyndaǵy ákesiniń úıine de tintý júrgizildi. Onda 12-kalıbrli IJ-26 tegis uńǵyly myltyq qabymen, oǵan arnalǵan optıka, pyshaq jáne tapansha túrindegi ottyq tárkilendi», – dedi Almaty qalasy PD Esirtki qylmysyna qarsy kúres basqarmasynyń bastyǵy Erlan Álmaǵambetov.
Atalǵan derek boıynsha sotqa deıingi tergeý bastaldy. Qylmystyq is QR QK-niń 291-baby 1-bóligi boıynsha tirkeldi.