Jyl basynan beri qoǵamdyq oryndardy lastaýǵa baılanysty 5370 quqyq buzýshylyq anyqtaldy.
Almaty polısıasy qala turǵyndaryn qoqys tastamaýǵa shaqyrdy, – dep habarlaıdy Almaty-akshamy.kz Polisia.kz-ke silteme jasap.
Almaty polısıasy qoǵamda “quqyq buzýshylyqqa múldem tózbeýshilikti” qalyptastyrýǵa erekshe kóńil bóledi. Nóldik tózimdilik – usaq quqyq buzýshylyqtarǵa teris reaksıa. Árkim azamattardyń quqyǵyn qurmettep, qoǵamdyq tynyshtyqty buzbaı, mádenıetin tanytýy kerek.
«Búginde kóshedegi qylmystardyń aldyn alýdyń negizgi tutqasy – ákimshilik quqyq buzýshylyqtardyń der kezinde jolyn kesý, sondaı-aq olardyń jasalýyna múldem tózbeýshilik tanytý. Bul baǵyttyń mańyzy erekshe, sebebi usaq quqyq buzýshylyqtar, meıli qoqys tastaý, jol qozǵalysy erejelerin buzý jáne basqa da zańsyz kórinister bolsyn, azamattardyń keleshekte asa aýyr áreketter nemese qylmystar jasaýyna alǵysharttar bolyp sanalady», – dedi Almaty qalasy PD jergilikti polısıa qyzmeti basqarmasy basshysynyń orynbasary Dıas Dýanbekov.
Ákimshilik zańnamanyń talaptaryna sáıkes qoǵamdyq oryndardy lastaý QR ÁQBtK-niń 434-baby boıynsha jaýapkershilik kózdelgen quqyq buzýshylyq bolyp sanalady. Almatyda jyl basynan beri qoǵamdyq oryndardy lastaýǵa baılanysty 5370 quqyq buzýshylyq anyqtaldy. Aıyppul somasy 91 mıllıon teńgeden astam boldy. Sondaı-aq polıseıler usaq quqyq buzýshylyqtardyń jolyn kesýde qaladaǵy zańdylyq pen tártiptiń jaı-kúıine beı-jaı qaramaıtyn azamattyq qoǵamǵa erekshe ról júkteletinin atap ótti. Belsendiler, ádette, ózderine belgili derekterdi buqaralyq aqparat quraldary men áleýmettik jeliler arqyly habarlaıdy. Osyǵan baılanysty tártip saqshylary joǵaryda atalǵan resýrstarǵa keńinen monıtorıń júrgizip jatyr.