Sońǵy jyldary býkmekerlik keńseler sany eki esege azaıdy.
Bıyl respýblıka boıynsha 3 670 zańsyz onlaın-kazıno buǵattalǵan, dep habarlaıdy Almaty-akshamy.kz mádenıet jáne sport mınıstrliginiń baspasóz qyzmetine silteme jasap.
Eger 2021 jyldyń basynda elimizde 38 býkmekerlik keńse bolsa, búginde olardyń sany – 16, al is júzinde jumys isteıtinderiniń sany – 12.
"Mınıstrlik býkmekerlik keńseler men oıyn bıznesiniń basqa da nysandarynyń zań normalaryn saqtaýyn muqıat qadaǵalaıdy. Máselen, osy jyldyń basynan mınıstrlik sot tártibimen oıyn bıznesi salasyndaǵy 7 lısenzıanyń qoldanylýyn toqtatty. Osyǵan uqsas taǵy 7 uıymǵa qatysty jumys atqarylyp jatyr. Sondaı-aq ınternette de monıtorıń júrgiziledi. Bıyl 3670 zańsyz onlaın-kazıno buǵattaldy",- dedi mádenıet jáne sport vıse-mınıstri Erjan Erkinbaev.
Vedomstvo aqparatynsha, mınıstrlik túsindirý arqyly jáne sot tártibimen býkmekerlik keńselerdiń sanyn azaıtý boıynsha jumys júrgizedi. Mysaly, sońǵy úsh jylda býkmekerlik keńseler 15 lısenzıany óz erkimen tapsyrǵan.
Al osy jyldyń basynan sot sheshimimen 5 býkmekerlik keńse jabyldy, olardyń jumysy qoldanystaǵy zańnama normalaryna sáıkes kelmedi. Qazirgi ýaqytta taǵy 3 býkmekerlik keńsege qatysty lısenzıalardyń kúshin joıý jumysy júrip jatyr.
Qazaqstandaǵy oıyn bıznesi sýbektileriniń jalpy sany da azaıyp jatyr. Sońǵy 5 jylda olar 2,5 ese azaıǵan. Eger 2018 jyly 97 bolsa, bıyl olardyń sany 38 birlikti quraıdy.