Sotqa deıingi tergeý barysynda kúdikti óz kinásin tolyqtaı moıyndady
Almaty polısıa departamenti qalada kólik urlyǵymen aınalysqan kúdiktini ustady, , dep habarlaıdy Almaty-akshamy.kz.
Buryn birneshe ret sottalǵan Almaty oblysynyń turǵyny bóten bireýdiń jol talǵamaıtyn kóligin urlap ketti. Áýezov aýdany polısıasynyń málimetinshe, 31 jastaǵy K. esimdi azamat buryn alaıaqtyq jáne qaraqshylyq jasaǵany úshin jazasyn ótegen.
Bul joly er adam kólik urlaýdy qolǵa alǵan. Ol Toyota Land Cruiser kóligin ekinshi shaǵyn aýdanda baıqaǵan. Jol talǵamaıtyn kóliktiń ıesi kóliginiń joǵalǵanyn, qaladan shyǵyp ketkenin telefonyna GPS qosymshasy arqyly SMS-habarlama kelgen kezde ǵana anyqtaǵan.
– Jedel-izdestirý is-sharalary barysynda kóliktiń turǵan jeri anyqtaldy. Patrúldik jasaq osy qylmysty jasady degen kúdikpen K. esimdi azamatty ustady. Sotqa deıingi tergeý barysynda kúdikti óz kinásin tolyqtaı moıyndady. Ustalǵan azamattyń osyǵan uqsas basqa da oqıǵalarǵa qatysy bar ekendigi joqqa shyǵarylmaıdy. Bul baǵytta tekserý jumystary jalǵasýda. Tergeý kezeńinde K. esimdi azamat ýaqytsha ustaý ızolátoryna qamaldy, – dedi Áýezov aýdandyq Polısıa basqarmasynyń bastyǵy Ulan Ábilqaıyr.