Bizdiń búgingi keıipkerimiz – qaladaǵy A.P.Chehov atyndaǵy ortalyq kitaphananyń «Oqyrmandarǵa qyzmet kórsetý bóliminiń» qyzmetkeri Aınur Balaýbaeva. Joǵary bilim ıesi. Ol osy kitaphana esigin ashqanǵa deıin «kitaphanashy tek oqyrmannyń suraǵan kitabyn taýyp berip, múlgigen tynyshtyqta únsiz ǵana otyratyn adam» dep oılaýshy edi. Múldem olaı emes eken. Kitaphana – naǵyz qaınaǵan tirshiliktiń, rýhanıattyń uıasy bolyp shyqty.
Ákesi gazet-jýrnal degennen aqshasyn aıamaıtyn, kóp basylymdardy jazdyryp alatyn. Poshtashy úıge «Jalyn», «Juldyz», «Mádenıet jáne turmys» jýrnaldaryn, «Qazaqstan pıoneri» jáne taǵy basqa da gazetterdi alyp kelgende, bári talasa-tarmasa oqıtyny esinde. Ádebıetke, sóz ónerine, kórkem shyǵarmalarǵa, jalpy kórkemdikke mahabbaty sol shaqta oıanǵan sekildi.
Osydan bes jyl buryn izdep júrip, kitaphanaǵa kelip túıindemesin qaldyryp ketken bolatyn. Aınurmen biraz sóılesken kitaphana ákimshiligi ony nebári eki aptanyń ishinde jumysqa qabyldady. Kózi ashyq, kókiregi oıaý ekenin tanyǵannan bolar.
Osynda kelgeli túrli ádebı-tanymdyq keshter, Oljas Súleımenov, Murat Áýezov, Seken Turysbekov syndy tulǵalardan bastap, kóptegen zıaly qaýym ókilderimen kezdesýler, mádenı is-sharalar ótkizip, alǵysqa bólenip júrgen jaıy bar. «Jaıyqtyń aq shaǵalasy atanǵan» aqyn, QR Eńbek sińirgen qaıratkeri Aqushtap Baqtygereevanyń Almatynyń ortalyq kitaphanasyna kelip qonaq bolyp ketkenin áli umytpaıdy. Poezıaǵa toly keremet, áserli kezdesýdiń sońyn aqynnyń kitaphanashy Aınurdyń ónerli, ánshi qyzy Káýsarǵa bergen batasy túıindegende, júregi tolqydy. Aq bata qabyl boldy ma eken, búginde búldirshin Káýsardyń sózderi túıdek-túıdek, túıeden túskendeı sóılep qoıatyny bar arasynda. Kishkentaı bolsa da sóz qadirin túsinetinine qýanady. Osy keshte aqynǵa tosyn syı jasap, bir kishkentaı balanyń sartyldatyp óleńin oqyp bergeni bar-dy. Aınur keshtiń uıymdastyrý sharalarymen júrip keıin aty-jónin naqtylap alýdy da umytyp ketipti. Qazir sol sáýleli bala, kishkentaı oqyrmanymyz qaıda júr eken dep oılap qoıatyny da bar keı-keıde.
Sondaı mádenı-rýhanı keshterge qatysqan jáne óz keregin izdep kelip, tapqan oqyrmandar alǵysyn bildirip jatsa, bul salada beker júrmegenin sezinip, ózin baqytty sezinetinin de jasyrmady. Iá, ol súıikti isine degen shabytty oıly oqyrmandarynyń alǵysynan alady.
Árdaıym «Kitap kózdiń kórý qabiletin jaqsartýǵa sebep bolady jáne adamnyń oılanýyna, oqıǵalar men keıipkerlerdi kóz aldyna elestetýge múmkindik beredi. Sol sebepti oqyrman men kitaphana tyǵyz baılanysta bolýy qajet» degen pikirdegi Aınur búgingideı gadjetter, ǵalamtor ústemdik qurǵan zamanda jastardyń tegis kitaptan «bezip» ketpegenin, qaıta olardyń arasynda kitapqumarlardyń kóbeıip kele jatqanyn asa yqylaspen aıtyp otyr.
– Bizge keletin jastar óte kóp, kitaphana demalyssyz tańǵy 9-dan keshki 8-ge deıin jumys isteıdi. Biz qalaıda jas býyndy kitappen dostastyrǵymyz keledi. Óıtkeni, jastardyń keleshekte óz salasynyń naǵyz mamany bolyp qalyptasýyna, kórkem minezdi, bilimdi bolýyna kitaptyń bereri mol ekeni sózsiz. Qaǵaz ben qalamdy, ónerdi serik etken belgili tulǵalarmen kezdesý keshterinde olar ózderine qyzyqty saýaldaryn qoıyp, tym bolmasa jazylǵan kitap týraly aqparat alyp ketedi. Kitapty janyna serik etken jastar mundaı is-sharalardy jibermeıdi. Mysaly, taıaýda Sherhan Murtaza atamyzdyń 90-jyldyq mereıtoıyna arnap «Qazaq ádebıetiniń qyzyl jebesi» atty ádebı-sazdy kesh ótkizdim. Keremet ótti. T.Júrgenov atyndaǵy Óner akademıasynyń stýdentteri «Myltyqsyz maıdan» shyǵarmasynan sahnalyq qoıylym usyndy. Áshirbek Kópish aǵamyz «Sher-aǵańnyń ózin kórgendeı boldym» dep jastarǵa rızashylyqpen batasyn berdi. Osy keshke kelgen jastar bolashaqta Muhtar Áýezov, Ahmet Baıtursynuly, Qabdesh Jumadilov syndy qalamgerlerdiń ómiri men shyǵarmashylyǵy týraly bilsek dep, basqa da kózi zıaly qaýym ókilderimen kezdesý uıymdastyrýdy ótinip ketti. Osyndaı jastar bar kezde jastar kitap oqymaıdy dep qalaı aıtamyz?! – dep tebirendi Aınur zamandasymyz.
Osy aptanyń basynda kitaphanada Aınur Balaýbaevanyń uıymdastyrýymen taǵy bir ádemi kesh ótti. Qazaq mýzyka óneriniń kórnekti qaıratkeri, kúıshi-kompozıtor Nurǵısa Tilendıevke arnalǵan «Qaharman Nurǵısa» jáne «Ǵasyr sazyn terbegen» kitaptary tanystyrylyp, oqyrmanǵa jol tartty. Nurǵısa Tilendıev degende esimizge birden «Otyrar sazy» orkestri túsedi emes pe. Osy orkestrde buryn dırıjer, Nurǵısanyń kómekshisi bolǵan, qazirgi kúni K.Baıseıitova atyndaǵy daryndy balalarǵa arnalǵan respýblıkalyq mamandandyrylǵan mýzykalyq orta mektep-ınternatynyń oqytýshysy Seıitqalı Qashaǵanov paketpen kirip kele jatqanda Aınur qatty tańyrqaǵan. Sóıtsek ol kisi uzaq jyldar saqtaǵan, sazgerdiń kózi tirisinde ózine bergen eki kitabyn, úıge kıgen shapanyn kóterip kelipti. Kúıshi-sazgerdiń mýzeıine tabystady. Osyndaı ádebı, mádenı kezdesýlerdi jıi uıymdastyratyn jáne sodan lázzat alyp rahattanatyn kitaphanashy jastardyń júregine rýhanıattyń dánin sebe almas, maqsatymnyń oryndalǵany deıdi.
● Qysqa-nusqa
– EŃ SÚIİKTİ KİTABYŃYZ ben EŃ SÚIİKTİ KEIİPKERİŃİZ?
– Ázilhan Nurshaıyqovtyń «Mahabbat, qyzyq mol jyldar» kitaby. Ondaǵy Erbol men Meńtaıdy jaqsy kóremin.
– ÚIİŃİZDEGİ KİTAP QORY QANSHA?
– Biraz bar. Kóp dep te, az dep te aıta almaımyn. Ár qazaqtyń úıinde bar M.Áýezovtiń «Abaı jolynan» bastap, tarıhı kitaptar, nebir myqty aqyn-jazýshylardyń kitaptaryn jınaǵam, áli de jınap júrmin.
– HOBBIİŃİZ?
– Adamdarmen sóılesip, olardyń tilin taba bilý. Ekinshi hobbıi – kitap oqý. Sońǵy oqyǵan kitabym – Aqberen Elgezektiń «Bolmaǵan balalyq shaǵy».
– BALAŃYZ KİTAP OQI MA?
– 2-synypta oqıtyn Káýsar atty qyzym bar. Alty jasynan gımnazıada oqyp júr. Kitapty jaqsy kóredi. Jattaýy tez, birdeńe oqysa qaǵyp alady. Nebir baıqaýlardyń jeńimpazy. Ol – meniń maqtanyshym.