Ótken demalys kúnderi ǵana qala joldarynda 1200 quqyq buzýshylyq anyqtaldy.
Qazaqstan Respýblıkasynyń Jol qozǵalysy erejelerin saqtaý jáne buzýshylyqtardyń aldyn alý maqsatynda Almatyda patrúldik polısıa polkiniń jáne mamandandyrylǵan batalónynyń qyzmetkerleri aýqymdy jáne jergilikti is-sharalar ótkizip jatyr, dep habarlaıdy aqshamnews.kz Polisia.kz-ke silteme jasap.
"Tártip buzýshylardy anyqtaý – bizdiń baqylaýymyzda. Jyl basynan beri qarama-qarsy jolaqqa shyǵyp ketkeni úshin – 690, jalǵan memlekettik tirkeý nómiri bar kólik quralyn basqarǵany úshin – 254, memlekettik nómiri joq kólikti basqarǵany úshin – 991, kólik quralyn mas kúıinde basqarǵany úshin – 1540, kólik quralyn júrgizýshi kýáliginsiz basqarǵany úshin – 3971, apattyq jaǵdaı týǵyzǵany úshin 6848 júrgizýshi jaýapqa tartyldy", – dedi Almaty qalalyq PD jergilikti polısıa qyzmeti basqarmasynyń bastyǵy Serik Shýmaev.
Osyǵan baılanysty, qala polıseıleri jol qozǵalysyna qatysýshylardy jol qozǵalysy erejelerin qatań saqtaýǵa shaqyryp, “jazanyń bultartpastyǵy” qaǵıdasyn eske saldy
"Kún jylysymen kólikti qatty júrgizýge qumar júrgizýshiler kóbeıedi. Sáıkesinshe jol erejesi buzylady. Jastar qaýip týdyryp, qala kóshelerimen jarys uıymdastyrady. Sonymen qatar olar kólikterin túrlendirip, tyıym salynǵan jabdyqty, onyń ishinde qatty dybys shyǵaratyn rezonatorlardy ornatady. Bul qala turǵyndarynyń ádil synyna sebep bolýda. Osyndaı derekterdiń jolyn kesý maqsatynda aldyńǵy sheptegi polısıa bólimsheleri apta saıyn reıdter júrgizedi. Bul jumys áli de jalǵasyn tabady. Bul sharalar joldardaǵy qaýipsizdik deńgeıin arttyrýǵa baǵyttalǵan", – dedi Shýmaev.