Asa iri kólemde birqatar alaıaqtyq jasady degen kúdikpen Túrkistan oblysynyń 55 jastaǵy týmasy ustaldy.
5 jábirlenýshige keltirilgen jalpy materıaldyq shyǵyn 65 mln teńgeni qurady. Polıseılerdiń málimetinshe, 55 jastaǵy O.esimdi azamat ustalyp, QR QİJK-niń 128-babyna sáıkes ýaqytsha ustaý ızolátoryna qamaldy, dep habarlaıdy Almaty-akshamy.kz Polisia.kz-ke silteme jasap.
«Tergeý barysynda er adamnyń beıtanys adamdardyń senimine kirip, Almaty qalasynyń kez kelgen aýdanynda jer telimderin, jyljymaıtyn múlikti tirkeýge, zańdastyrýǵa jáne jer telimine memlekettik aktilerdi alyp beremin dep usynys jasaǵany anyqtaldy. Kúdikti bastapqy tólemdi alyp, sodan keıin klıenttiń aqshasymen joǵalyp ketti. Qazirgi ýaqytta bizdiń bólimshege bes adam aryzben júgindi», – deıdi Almaly aýdandyq polısıa basqarmasynyń bastyǵy Oljas Sháripov.
Polısıa qyzmetkerleri kúdiktiniń qalanyń basqa aýdandarynda da osyǵan uqsas qylmystarǵa qatysy bolýy múmkin ekenin joqqa shyǵarmaıdy. Osyǵan baılanysty polısıa qyzmetkerleri azamattardy kúdiktini tanyǵan jaǵdaıda myna telefon nómirlerine habarlasýǵa shaqyrady: 8-705-555-77-63 jáne 8-778-591-91-35. QR QK-niń 201-babyna sáıkes ózge aqparat tergeý múddesine oraı jarıa etilmeıdi. QR Konstıtýsıasynyń 77-baby 3-bólimi, 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady.