Tapsyrmalar sany men joǵary bal ózgerissiz qaldy.
Ǵylym jáne joǵary bilim mınıstri Saıasat Nurbek 2024 jylǵy UBT formatyna engiziletin ózgerister jaıynda aıtty, dep habarlaıdy Almaty-akshamy.kz
Mınıstrdiń aıtýynsha, 2024 jylǵy UBT-da test suraqtarynyń sany ózgeredi, sondaı-aq beıindik pánderge jańasha tapsyrmalar qosylyp, testileý ýaqyty qysqarady.
"UBT-daǵy pánderdiń sany ózgerissiz qalady, ıaǵnı úsheýi mindetti jáne ekeýi tańdaý pánderi. Alaıda "Oqý saýattylyǵy" men "Matematıkalyq saýattylyq" mindetti pánderinen tapsyrmalar sany 5 suraqqa qysqarady. Al beıindik pánderdiń suraqtar sany artyp, 40 test tapsyrmasynan turady. Beıindik pánderde berilgen tizimnen sáıkestikti anyqtaýǵa arnalǵan 5 tapsyrma qosylady. Bul ózgerister – test tapsyrmalarynyń sapasyn arttyrý men olardyń fýnksıonaldyq saýattylyq pen synı oılaý daǵdylaryn baǵalaýdyń álemdik standarttaryna sáıkestigi baǵytyndaǵy jumystardyń qısyndy jalǵasy", dep jazdy ǵylym jáne joǵary bilim mınıstri.
UBT tapsyrmalar sany men joǵary bal ózgerissiz qaldy. Jalpy 120 suraq, 140 bal:
Qazaqstan tarıhy – 20 tapsyrma;
Oqý saýattylyǵy – 10 tapsyrma;
Matematıkalyq saýattylyq – 10 tapsyrma;
eki beıindik pán boıynsha – 40 tapsyrma.
Joǵaryda atalǵan ózgeristerge baılanysty testileý ýaqyty qysqarady. Endi UBT tapsyrýǵa oqýshylarǵa 3 saǵat 30 mınýt (210 mınýt) bólinedi. Buryn 4 saǵat (240 mınýt) berilgen. Bul rette erekshe bilim berý qajettilikteri bar balalar úshin usynylatyn qosymsha 40 mınýt ýaqyt saqtalatynyn aıta ketý kerek.
"Shyǵarmashylyq baǵyttardy tańdaǵan talapkerler "Qazaqstan tarıhy" men "Oqý saýattylyǵy" pánderimen qatar "Matematıkalyq saýattylyqty" mindetti pán retinde tapsyrady. "Matematıkalyq saýattylyqtan" test tapsyrmalary ómirde matematıkalyq logıka boıynsha alǵan bilimderin, daǵdylaryn qoldana alýyn tekserýge baǵyttalǵan. Sondyqtan bul pán barlyq talapkerge mindetti", – dedi Saıasat Nurbek.
Mınıstrdiń aıtýynsha, beıindik pánderdiń kombınasıasy boıynsha da ózgerister bar. Oqýshylardyń, ata-analardyń jáne pedagogıkalyq qaýymnyń pikirleri men usynystaryn eskere otyryp, "B059 – Komýnıkasıalar jáne komýnıkasıalyq tehnologıalar", "B055 – Matematıka jáne statısıka", "B063 – Elektrotehnıka jáne avtomattandyrý" bilim berý baǵdarlamalarynyń toptaryna túsýshiler "Matematıka-Informatıka" kombınasıasyn tapsyrady.
2024 jyly talapkerler bıylǵydaı UBT-ny bes ret tapsyra alady. Onyń ekeýi grant taǵaıyndaý konkýrsyna qatysýǵa múmkindik berse, qalǵan úsheýi aqyly oqýǵa túsýge múmkindik beredi.