Almaty qalasy Almaly aýdanynyń polıseıleri iri kólemde ınternet-alaıaqtyqty toqtatty, - dep habarlaıdy Aqshamnews.kz.
Polisia.kz aqparatyna saı, kezekshi bólimge jergilikti turǵyndar júginip, 21 jastaǵy uldarynyń joǵalyp ketkenin habarlaǵan.
Jas jigit ózimen birge altyn buıymdar men jınaǵan aqshany alyp, úıinen shyǵyp ketken. Ol birneshe saǵat boıy baılanysqa shyqpaǵan. Ata-anasy onyń kompúterindegi kúmándi hat almasýdy baıqap, birden polısıaǵa júgingen. Polısıa qyzmetkerleri jigittiń ornalasqan jerin anyqtap, onyń ınternet-alaıaqtardyń yqpalynda bolǵanyn anyqtady. Tártip saqshylarynyń jedel áreketiniń arqasynda otbasynyń jınaǵan 4 mıllıon teńgeden astam qarajatyn saqtap qalý múmkin boldy.
- Alaıaqtar azamattardy túrli qaýipke toly tizbekterge tartý úshin psıhologıalyq qysym men aldaýdy jıi qoldanady. Kúmándi jaǵdaı baıqalǵan kezde birden polısıaǵa júginý óte mańyzdy. Bul jaǵdaıda biz jas jigittiń ornalasqan jerin shuǵyl anyqtap, zańsyz áreketterdiń jolyn kestik. Qazir alaıaqtyqqa qatysy bar adamdardy anyqtaý jáne ustaý sharalary júrgizilýde, - dedi Almaly aýdandyq polısıa basqarmasynyń jedel kezekshisi Ádilet Slámbaev.
- Biz ulymyzdyń beıtanys adamdarmen hat almasyp, olardyń nusqaýymen aqsha aýdarmaq bolǵanyn baıqadyq. Dereý dabyl qaǵyp, polısıaǵa bardyq. Osy jerde bizge kómektesti, balamyzdy jyldam taýyp, alaıaqtyqtyń aldyn aldy. Polısıa qyzmetkerlerine kásibıligi men qoldaýy úshin alǵys aıtamyz, – dedi jigittiń ákesi.
Almaty polısıasy qala turǵyndaryn qyraǵy bolýǵa, kúmándi ınternettegi tanystarǵa senbeýge shaqyrady. Alaıaqtyq belgileri baıqalǵan jaǵdaıda ishki ister organdaryna dereý habarlasý qajet.