Almaty ákimi Darhan Satybaldy jumys sapary barysynda "Barlyq" bazary ornalasqan aýmaqtaǵy negizgi ınfraqurylymdyq jobalardyń júzege asý barysyn kórdi. Bul jobalar qalanyń kólik jáne ınjenerlik júıesin damytýǵa baǵyttalǵan.
Ákim metropolıtenniń birinshi jelisiniń úshinshi kezegine qatysty jobaǵa toqtaldy. Ol "Qalqaman" stansıasynan "Barlyq" bazaryna deıingi aralyqty qamtıdy. Josparǵa sáıkes, uzyndyǵy 5,3 shaqyrymdyq tonnelder qazylyp, úsh stansıa salynbaq. Sonymen qatar "Barlyq" bazary aýmaǵynda biryńǵaı kólik-aıyrbas toraby (hab) jasalady.
Bolashaq hab quramyna metro stansıasy, qalaaralyq avtobeket, jeńil relsti kólik stansıasy jáne avtoturaq kiredi. Joba Almatynyń shet aımaqtaryn ortalyqpen baılanystyryp, turǵyndardyń barynsha yńǵaıly qoǵamdyq kólikpen qatynaýyna múmkindik beredi.
Sapar barysynda Darhan Satybaldy jer asty sý alý qondyrǵysy – "Aqjaıyq (Barlyq)" jobasymen de tanysty. Jańa nysan Naýryzbaı jáne Alataý aýdandaryndaǵy 80 myńnan astam turǵynǵa táýligine 43 myń tekshe metrge deıin sý beredi. Bul joba qalanyń batys bóligin sý júıesimen qamtıdy.
Sapar sońynda qala ákimi metro qurylysyna arnalǵan jer telimderin kelisý men satyp alýdy jedeldetý, jobalyq-smetalyq qujattamanyń memlekettik saraptamadan belgilengen merzimde ótýin qamtamasyz etýdi tapsyrdy. Sonymen birge, bolashaq kólik torabynyń qaýipsizdigi men jaılylyǵyna basa nazar aýdarýdy ári "Aqjaıyq (Barlyq)" sý alý jobasyn qatań baqylaýda ustaýdy mindettedi.