Almatyda respýblıkalyq «Qarý» jedel aldyn alý is-sharasy ótýde.
Ol tıisti qoǵamdyq tártipti saqtaý, atys qarýyn qoldanýmen jasalǵan qylmystardyń aldyn alý jáne jolyn kesý maqsatynda ótkizilýde, dep habarlaıdy Almaty-akshamy.kz Polisia.kz-ke silteme jasap.
«Azamattyq jáne qyzmettik qarý aınalymyna tıimdi memlekettik baqylaýdy qamtamasyz etý boıynsha sharalar qabyldandy. Zańsyz saqtalǵan qarýdy anyqtaý úshin 38 top quryldy. Jedel aldyn alý is-sharasyn ótkizý kezeńinde barlyǵy 147 azamattyq jáne qyzmettik qarýdy saqtaý, esepke alý jáne qaıta tirkeý sharttaryn buzý derekteri anyqtalyp, nátıjesinde 145 jeke menshik ıesi jáne 2 zańdy tulǵa QR ÁQBtK-niń 484-baby (Azamattyq jáne qyzmettik qarý aınalymy qaǵıdalaryn buzý) jáne QR ÁQBtK-niń 486-baby (Azamattyq, qyzmettik, marapattyq, koleksıalyq qarýdy tirkeý (qaıta tirkeý) ne ony esepke qoıý tártibin buzý) boıynsha ákimshilik jaýapkershilikke tartyldy. Anyqtalǵan zań buzýshylyqtar joıylǵanǵa deıin 89 birlik tirkelgen qarý tárkilendi. Odan bólek, zańsyz aınalymnan 8 birlik tirkelmegen qarý, 1 birlik jarylǵysh zat, 549 myltyqtyń patrony, 6 tegis uńǵyly qarýdyń patrony, 10 travmatıkalyq qarýdyń patrony, 5 dana sýyq qarý, 2 jaryqty-shýly granata tárkilendi. QR QK-niń 287-babyna (Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý) sáıkes tirkelmegen tegis uńǵyly, gaz-travmatıkalyq jáne gazdy qarýdy zańsyz saqtaý boıynsha barlyǵy 11 qylmystyq is tirkeldi», – dep habarlady Almaty qalalyq PD ákimshilik polısıa basqarmasynyń bastyǵy Asqat Qulbaev.
Sondaı-aq PD-da tekserispen pnevmatıkalyq qarýlar men elektroshokerlerdi satatyn jerler qamtylǵanyn, zańǵa sáıkes, qarýdy satý quqyǵyna lısenzıasy bar zańdy tulǵalar satýy tıis ekenin atap ótti.
«Qaladaǵy bazarlardaǵy saýda oryndaryn tekserdik. “Ialán” bazarynda pnevmatıkalyq myltyq pen elektroshokerlerdi satatyn jeke kásipkerler anyqtaldy. Olar tárkilenip, saraptamaǵa jiberildi, nátıjesinde sharalar qabyldanyp, quqyqtyq baǵa beriletin bolady», – dedi Almaty qalalyq PD ÁPB azamattyq jáne qyzmettik qarý aınalymyn baqylaý bóliminiń basshysy Rahım Tolokýlov.