Kóńdi kádege jaratty.
Abaı oblysynyń Aqsýat aýdany Ekpin aýylynyń turǵyny Maqsat Kúshebaev otynnyń jańa túrin oılap tapty, dep habarlaıdy Almaty-akshamy.kz Massaget.kz-ke silteme jasap.
Iá, rasynda tańǵalarlyq. Tańǵalarlyǵy sol, ónertapqysh azamat shóptiń saǵdary men maldyń astynan shyǵatyn kóńnen kómir daıyndaǵan. Ol úshin óz qolymen stanok qurastyrypty.
«Maldyń astynan shyqqan kóń men shóptiń saǵdarlaryn jurt órtep jatyr. Bosqa órtegenshe nege otyn retinde paıdalanbasqa" degen oı keldi. Sóıtip, arnaıy stanoktyń kómegimen kóń men shóp qaldyqtaryn syǵyp, birneshe bólikke bólip, kómir jasap jatyrmyn. Jylýy da, qyzýy da kúshti. Mundaı qurylǵy ár aýylda bolsa dep oılaımyn. Bir jaǵynan, turǵyndarǵa jumys, ekinshi jaǵynan, kóp-kórim kómek bolar edi», - deıdi ónertapqysh.
Maqsat Kúshebaev buryn MTM-da (mashına-traktor stansasy) usta bolyp jumys istegen eken. Qazir jeke kásipker. Elimiz táýelsizdigin alǵan eleń-alań shaqta aýylda tehnıka qalmaǵanda óz qolymen shóp tasıtyn kólik pen temir tor toqıtyn stanok jasapty. Al jaqynda ázirlegen kóń men saǵdardan kómir shyǵaratyn qurylǵy men otynnyń jasalý tehnologıasy týraly tolyq ashyp aıtpady.
«Maqtanyp aıtýǵa áli erte. Qazir bul qurylǵy jartylaı jumys istep tur. Ákimshilik qoldaý bildiremiz dep otyr. Sol kezde qural-saımandardy alyp, stanokty tolyq iske qosamyn», - deıdi Maqsat Kúshebaev.