Usynylǵan joba boıynsha marshrýt qazirgi joldan batysqa qaraı 10-12 shaqyrymǵa jyljytylady
Respýblıkalyq mańyzy bar Almaty – Óskemen baǵytyn Qonaev qalasynan tys shyǵarylýy múmkin. Bul týraly Almaty oblysy sáýlet basqarmasy bas jospar jáne aýmaqty damytý basqarmasynyń basshysy Aıdos Kúnesbaev aıtty, dep habarlaıdy Almaty-akshamy.kz Tengrinews.kz-ke silteme jasap.
Aıta keteıik, qazir bul baǵyttyń bir bóligi – Almatydan Taldyqorǵanǵa deıin aqyly.
A3 tasjoly Qonaev qalasynyń dál ortasynan ótedi. Bul joldyń boıynda kazıno men oıyn zaldary ornalasqan. Biraq bul tasjol Qonaevtyń jańa bas josparyna sáıkes kelmeıdi.
"Biz Almaty-Óskemen tasjoly boıynda ornalasqanbyz. Joldy jyljytýdy, ıaǵnı tasjoldy qala syrtyna jyljytýdy usynyp otyrmyz. Bul júrdek magıstral bolǵandyqtan, norma boıynsha qalada buǵan jol berilmeıdi. Burynnan bar joldyń maqsaty ózgeredi, ol jańa "İle" shaǵynaýdanyna aparady. Qazir bul respýblıkalyq mańyzy bar, A3 sanatyndaǵy jol. Aýystyrý boıynsha usynystar berip jatyrmyz", – dedi Kúnesbaev.
Usynylǵan joba boıynsha marshrýt qazirgi joldan batysqa qaraı 10-12 shaqyrymǵa jyljytylady. Qazirgi baǵyt jergilikti jolǵa aınalady.
"Osy jol arasyna qalalyq nysandardy ornalastyrýdy kózdep otyrmyz. Bul aýmaqtarda ázirge eshteńe joq. Magıstral boıynda áskerı nysandar men qoımalar bar, biraq bolashaqta olardy da kóshirý usynylyp otyr", – dedi Almaty oblysy sáýlet basqarmasynyń bas jospary jáne aýmaqtardy damytý bóliminiń basshysy Aıdos Kúnesbaev.
Sonymen qatar, temirjol da qala syrtyna jyljytylady, ol da qazir Qonaev arqyly ótedi.