Bul - 2012 jyly Almaty oblysynyń Qarasaı aýdanynda bolǵan qylmys.
Almatyda 10 jyl buryn jasalǵan qylmysqa qatysty aıyptaý úkimi shyqty, dep habarlaıdy Almaty-akshamy.kz Naýryzbaı aýdandyq prokýratýrasyna silteme jasap.
Áńgime sonaý 2012 jyly Almaty oblysynyń Qarasaı aýdanynda bolǵan qylmys týraly. Tóbeles kezinde er adam qarsylasynyń ómirlik mańyzdy múshelerine birneshe ret pyshaq salǵan. Derek boıynsha polıseıler sotaldy tergeý amaldaryn bastaǵan. Alaıda keıin is toqtatylǵan.
«Polısıa kúdikti adam bola tura, jaýapqa tartatyn tulǵanyń anyqtalmaýyna baılanysty qylmystyq isti negizsiz toqtatty. Osylaısha qylmysker jaýapkershilikten bosaǵan. Tek Naýryzbaı aýdany prokýratýrasynyń aralasýynan keıin ǵana qylmystyq is qozǵaldy. Almatyda 2012 jyly bastalǵan qylmystyq iske qatysty zańdy qorytyndy shyqty», - dedi prokýrorlar.
Qadaǵalaý organynyń nusqaýymen is qaıta qozǵaldy. Osylaısha, birqatar tergeý amaly júrgizilip, kúdiktige adam óltirýge oqtalý baby boıynsha aıyp taǵylǵan. Ol qamaýǵa alyndy. Keıin prokýrorlar isti sotqa jibergen.
«2022 jyldyń naýryzynda sot aıyptalýshyǵa qatysty aıyptaý úkimin shyǵardy. Ol adam óltirýge oqtalý baby boıynsha kináli dep tanylyp, alty jylǵa bas bostandyǵynan aıyryldy. Bıyl mamyrda apelásıalyq sot úkimdi ózgerissiz qaldyrdy», - delingen habarlamada.
Sonymen qatar, prokýrorlar qylmyskerdi jaýapkershilikten bosatýǵa jol bergen polısıa qyzmetkerleriniń áreketine quqyqtyq baǵa berý úshin materıaldardy PD ishki qaýipsizdik bólimine joldaǵan.