Oǵan sebep:Talǵar aýdanyna qarasty Gúldala aýylyndaǵy jalǵyz mektep kúrdeli jóndeýge jabylǵan.
Al, oqýshylardyń sapaly bilim alýyna eshqandaı jaǵdaı jasalmaǵan. Onlaın oqýdyń azabyn kórip otyrǵan ata-analar qapaly. «Ul-qyzdarymyzǵa vatsap arqyly sabaq ótedi», - degen ata-analar tıisti mekemelerden qaıyr joq dep otyr, dep habarlaıdy Almaty-akshamy.kz. Qazaqstan.tv saıtyna silteme jasap.
Osy mektepte eki uly oqıtyn Nurjámılá Dodaevanyń aıtýynsha, kúndelikti sabaq túski bir jarymda bastalady. Ózi jumysta bolǵandyqtan, balalardy qadaǵalaý da qıynǵa soǵyp júr eken.
«Birinshi qyrkúıekten bastap osylaı onlaın formatta oqyp jatyrmyz. Ózderińiz kórgendeı, vatsappen apaıy tapsyrma jiberedi, ony qasynda qadaǵalap qarap otyrmasań, balaǵa qıyn. Onlaın format bilim bolmaıdy. Óte qıyn. Balanyń kózine de zıan. Muǵalim oqytqandaı bolmaıdy», - deıdi aýyl turǵyny Nurjámılá Dodaeva.
Gúldaladaǵy jalǵyz mektep kúrdeli jóndeýge jabylǵan. Al, oqýshylardy Panfılov, Qyzyltý syndy kórshi aýyldarǵa aparyp ákeletin avtobýstar bólinýi kerek bolǵan. Oqý jylynyń bir jarym aıy ótse de, bul túıtkil sheshimin tappapty.
«Onlaınnan sharshadyq. Sharshaǵannan buryn men ózim balany oqyta almaımyn ondaı formatta. Densaýlyǵym nashar. Bala sezine almaıdy. Sol úshin bizge avtobýs kerek», - deıdi aýyl turǵyny Aıgúl Naýryzbaeva.
Balalar úshin qoǵamdyq kóliktiń bólinetini aıtylyp, tapsyrmanyń áli kúnge oryndalmaý sebebin aýdandyq bilim bóliminiń basshylary bylaı túsindirip otyr.
«Biz osymen konkýrsty tórtinshi ret berip jatyrmyz. Birinshi konkýrsta jeńimpaz atanǵan jeke kásipker tasymaldaýdan bas tartty. Ekinshi konkýrsta talapqa saı bolmaǵandyqtan, bas tartyldy. Úshinshi konkýrsta dál sondaı jaǵdaı boldy. Tórtinshisinde qazirgi jeńimpaz anyqtalyp otyr», - deıdi Talǵar aýdany bilim bólimi basshysynyń mindetin atqarýshy Lázzat Qurmanbaeva.
Mektep dırektory da ata-analardyń talaby oryndalatynyn rastady. Endi toqsan boıy qashyqtan oqytylǵan oqýshylar qatarlastary sekildi mektep qabyrǵasynda bilim alady.
«Búgin tústen keıin maǵan avtobýs parkiniń ókili keledi. Sol ýaqytta naqty avtobýstar sany aıtylady. Biraq, meniń keshe estýimshe, toǵyz 50 oryndyq avtobýs bólinedi. Bizge bul jetkilikti. Balalar úsh mektepke tasymaldanyp oqytylady», - deıdi №21 orta mekteptiń dırektory Qýan Aıtbaev.
Bul maqsatqa memleketten 11 mln teńgeden astam qarajat qarastyrylǵan. Talǵar aýdandyq bilim bólimi kúni erteńnen bastap oqýshylardy tasymaldaıtyn transporttar qatynaı bastaıdy dep ýáde berdi. Al, 6 aı buryn jóndeý jumystaryna jabylǵan mektep jospar boıynsha kelesi jyldyń basynda qaıta ashylady.