Oblystaǵy ákimder eki aptada geokarta jasap, málimet berýi kerek.
Almaty oblysynyń ákimi Marat Sultanǵazıev barlyq aýyldyq okrýgtiń sý qubyrlaryn tekserip, túgendeý jumysyn júrgizýdi tapsyrdy, dep habarlaıdy Almaty-akshamy.kz.
«Qonaev qalasy men aýdan ákimderiniń basyn qosqan alqaly jıynda oblys basshysy turǵyndar tarapynan sýǵa qatysty aryz-shaǵym jıilep ketkenin alǵa tartty», - delingen Almaty oblysy baspasóz qyzmetiniń habarlamasynda.
Marat Sultanǵazıevtyń aıtýynsha, jalpy, óńirdegi aýyldarda sýǵa qatysty týyndap otyrǵan másele kóp. Keıbir sý qubyrynda qysym jetkiliksiz, keıbirinde magıstraldyq sý júıesi rettelmegen. Endi birinde sý súzgisi jolǵa qoıylmaǵan.
«Osy máselelerdiń bárin aýyl ákimderimen birlesip, tekseristen ótkizip, joba-josparyn jasap alaıyq. Oblysty gazdandyrý jáne basqa da sala boıynsha jumystardy osylaı kartaǵa túsirip, ret-retimen isteýimiz kerek. Kógildir otyn keldi, gaz bar dep aıtqanymyzben is júzinde bári basqasha. Uıatty bolsa da aıtaıyq, gazdy jeke turǵyn úıler turmaq, aýrýhanalarǵa áli tolyq tarta almaı otyrmyz. Sý máselesi de solaı. Sý bar deımiz, biraq is júzinde kósheden tasyp iship, mashaqatyn kórip júrgen aýyl turǵyndary jeterlik», – dedi Marat Eleýsizuly.
Oblys ákimi jıynda atalǵan máselelerdi sheshý úshin eń aldymen óńirlerdi sýmen jáne kógildir otynmen qamtamasyz etý boıynsha tekserý, túgendeý jumysyn júrgizýdi mindettedi.
«Eki apta ýaqyt beremin. Búkil aýdan-aýdandaǵy eldi meken, aýyldar boıynsha sý, gaz, taǵy da basqa máseleler boıynsha geokarta jasap, málimet berilýi kerek. Qaı aýylda qaı qubyr istemeıdi, qaı qubyr tolyq jumys istep tur, qaı qubyrdyń qurylysy orta jolda qalyp qoıǵan, osynyń bári kartada kórsetilgeni jón. Eger biz osylaı júıelep almasaq, onda máseleniń sheshimin tabý qıyn. Qazir statısıkaǵa, derekterge báriniń qoly jetedi. Jasyryp qaıtemiz, joqty joq, bardy bar dep aıtý kerek. Onyń ústine qazir aýyl ákimderin saılap jatyrmyz. Halyq olarǵa senip otyr. Ákimder bar kúshin salyp, úlken umtylyspen, ynta-yqylaspen jumys isteýi qajet», – dep túıindedi Almaty oblysynyń ákimi.