Bul týraly Almaty qalasy ákimdiginiń Qalalyq mobıldilik basqarmasy basshysynyń orynbasary Ernur Abjahan habarlady.
Búgin ol Óńirlik komýnıkasıalar qyzmetiniń alańynda megapolıstiń jol ınfraqurylymyn damytý týraly aıtty, dep habarlaıdy Almaty-akshamy.kz.
E. Abjahannyń aıtýynsha, Almaty qalasynyń kóshe-jol jelisiniń uzyndyǵy 3096 shaqyrymdy quraıdy, onyń 234 shaqyrymy asfálttalmaǵan.
«Biz 2025 jylǵa qaraı qaladaǵy jaqsy joldardyń úlesin 95%-ǵa jetkizýdi josparlap otyrmyz. Ol úshin 234 km jańa jol salamyz, jyl saıyn keminde 200 km jolǵa ortasha jóndeý júrgizýdi josparlap otyrmyz», - dep habarlady spıker.
E. Abjahan joldardyń qurylysy týraly aıta kele, Buqtyrma kóshesi – Qulja traktisi, Seıfýllın dańǵyly – Jansúgirov kóshesi jáne Saın kóshesi – Móńke bı kóshesi úsh jolaıryǵynyń qurylysy boıynsha júrgizilip jatqan jumystar týraly baıandady.
Buqtyrma – Qulja traktisi kósheleriniń qıylysyndaǵy jumystar bekitilgen kestege sáıkes júrgizilip jatqany belgili boldy. Jer ýchaskelerin satyp alý aıaqtaldy. Qarajat tolyq kólemde bólindi.
«1 qyrkúıekke deıin estakada men pandýstardy salý boıynsha qurylys-montaj jumystaryn aıaqtap, sol arqyly barlyq baǵyttar boıynsha kólikterdiń júrýin qamtamasyz etý josparlanýda. Abattandyrýdy eskere otyryp, tolyq aıaqtaý 2022 jyldyń sońyna deıin josparlanyp otyr», - dedi ákimdiktiń QMB ókili.
Seıfýllın dańǵyly men Jansúgirov kóshesiniń qıylysyndaǵy jumystar da satyp alynǵan ýchaskelerde júrgizilýde. Jumystardy tolyq aıaqtaý 2023 jylǵa josparlanǵan.
Saın - Móńke bı kóshelerindegi jol aıryǵynyń qurylysy boıynsha daıyndyq jumystary bastaldy. JSQ túzetilýde. Bıyl komýnıkasıalardy qaıta qurý jáne aınalma joldardy salý boıynsha jumystar josparlanýda, al jumystardy tolyq aıaqtaý kelesi jyldyń sońyna josparlanǵan.