Prokýratýra merzimi ótpeı jatyp qoqystan tabylǵan dárilerge de qatysty tekserý júrgizetinin málimdedi.
Ekologıalyq apat. Kezinde aýdan ortalyǵy bolǵan Almaty oblysyndaǵy Shelek aýylynyń mańy qoqys dalasyna aınalyp barady, dep habarlaıdy Almaty-akshamy.kz Almaty.tv-ge silteme jasap.
Turǵyndardyń aıtýynsha, lastanǵan aýmaq qorshaýsyz jatqandyqtan, belgisiz adamdar munda kelip kóringen zatty tógip ketedi. Turmystyq qoqys qana emes, medısınalyq qaldyqtardy da, tipti janýar óleksesin de tastaıdy eken. Al ony qańǵyǵan ıtter kemirip, keıde aýyl ishine tasıdy
«Qoqys alańy qorshalmaǵan. Eshqandaı belgi de qoıylmaǵan. Ol jer asty sýymen aýyldarǵa barady. Bári sol sýdy iship otyr. 4-5 malym bar edi, óldi», – dedi Shelek aýylynyń turǵyny Erqanat Baıjarasov.
«Qaladan shyqqan qoqysty polıgonǵa ákelip, tógedi. «Qaıdan keldiń?» dep suraǵanymyzda, júrgizýshiler qaladan kelgenin aıtqan», – dedi Shelek aýylynyń turǵyny Nurmuhamed Muhamedjan.
Qoqys dalasyna aınalǵan aýmaqta tógilgen myna qara suıyqtyqtyń ne ekenin dóp basyp aıta almaımyz. Alaıda turǵyndardyń sózine sensek, odan keler zıan kóp. Al jerdegi qoqys shashylyp jatyr. Aıta ketsek, qoqys basqan aýmaqtyń ıesi bar. Ol azamat JSHS retinde dál osy qaldyqtardy óńdeý syndy qyzmet kórsetýi tıis bolǵan. Muny ózderi de moıyndap otyr.
«Shelekte qoqys tógetin arnaıy oryn joq. Eń jaqyny Talǵar aýdanynda ornalasqan. Biz ınvestısıalyq baǵdarlama arqyly qoqys óńdeý polıgonyn salýǵa ótinish berdik. Iaǵnı, medısınalyq qaldyqtardy órteıtin arnaıy pesh qoıdyrý josparda bar. Alaıda jerge ıelik etýge ruqsatty 1 jyl buryn ǵana aldyq. Endi iske kóshý úshin ekologıa komıtetiniń jaýabyn kútip otyrmyz», – dedi «Balıs» JSHS atqarýshy dırektory Oljas Toıshybekov.
O basta máseleni 1 jyl ishinde retteımin dep sóz bergen kásipker mekemeden jaýap qashan keletinin bilmeıdi. Almaty oblystyq ekologıa departamentiniń ókili bolsa, moratorııge baılanysty dáıeksiz tekserý júrgize almaıtynyn aıtty.
«Prezıdenttiń Jarlyǵyna sáıkes, kishi jáne shaǵyn bızneske tekserý toqtatyldy. Komıtet ruqsat bergen jaǵdaıda, ary qaraı prokýratýraǵa tirkeýge jiberemiz. Al tirkelse, departament tarapynan tıisti sharalar qabyldanatyn bolady», – dedi oblys boıynsha ekologıa departamentiniń bólim ınspektory Danıar Ómirbekov.
İstiń aq-qarasyn anyqtaý maqsatynda aýdandyq prokýratýraǵa da bardyq. Quzyrly organ ókilderiniń dereginshe, tıisti mekemeler tekserý jumystary boıynsha jaýapty 30 qańtarǵa deıin berýi kerek.
«Jer «Balıs 2007» JSHS-ǵa ınvestproekt boıynsha berilgen. Sol ınvestproekt boıynsha jobanyń iske asý zańdylyǵyn tekserip jatyrmyz», – dedi Eńbekshiqazaq aýdany prokýrorynyń orynbasary Aıdos Jumabaev.
Prokýratýra merzimi ótpeı jatyp qoqystan tabylǵan dárilerge de qatysty tekserý júrgizetinin málim etti. Zattaı aıǵaq retinde alynǵan qoraptar ekspertızaǵa joldanbaq. Aıta ketsek, Almaty oblysynyń ózinde 355 zańsyz qoqys úıindisi anyqtalyp, birazy retke keltirilgenimen, áli de tekserý jumysy jalǵasyp jatyr.