V Dúnıejúzilik Kóshpendiler oıyndaryna daıyndyq bastaldy
1 mamyr - Qazaqstan halqynyń birligi merekesine oraı Almaty oblysy Talǵar aýdanyndaǵy Qobylandy batyr atyndaǵy ıpodromynda QR Mádenıet jáne sport mınıstrligi men QR Aqparat jáne qoǵamdyq damý mınıstrliginiń qoldaýymen ushqyr báıgeden Qazaq World Cup týrnıri ótti.
Atalmysh jarysty QR Ulttyq sport qaýymdastyǵy, Almaty oblysynyń ákimdigi, respýblıkalyq «Báıge» federasıasy, «Qazaq Jokeı Klýby» qoǵamdyq uıymy men «Bayserke Agro» holdıńi uıymdastyrdy.
Týrnırdiń ashylýyna Almaty oblysynyń ákimi Marat Sultanǵazıev, QR Mádenıet jáne sport vıse-mınıstri Sársen Quranbek jáne QR Ulttyq sport qaýymdastyǵynyń prezıdenti Islambek Saljanov arnaıy qatysty.
Jarystyń saltanatty ashylýynda sóz alǵan Almaty oblysynyń ákimi M. Sultanǵazıev kórermenderdi 1 mamyr merekesimen quttyqtap, týrnır qatysýshylaryna sáttilik tiledi.
«Báıge berip, at shaptyrý - elimizdiń ejelden kele jatqan dástúri. Sharaǵa kelgen meımandardyń qarasy sonyń aıqyn nyshany dep bilemin. Búgingi tańda Almaty oblysynda Ulttyq sport túrlerinen 39 291 sportshy jattyǵatyn 774 seksıa bar. Qazaq world cup týrnıri Almaty oblysynda Ulttyq sporttyń keńinen dáriptelýine septigin tıgizedi dep bilemin», - dedi óz sózinde Marat Eleýsizuly.
QR Mádenıet jáne sport vıse-mınıstri Sársen Quranbek kelesi jyly elimizde ótetin V Dúnıejúzilik Kóshpendiler oıyndaryna daıyndyq jumystary qazirden qyzý bastalyp ketkenin jetkizdi.
«Memleket basshysy Qasym-Jomart Toqaev jalpy sporttyń, onyń ishinde ulttyq sporttyń damýyna erekshe kóńil bólip otyr. Biz kelesi jyly elimizde V Dúnıejúzilik Kóshpendiler oıyndaryn ótkizemiz. Oǵan álemniń 100-den asa elderi keledi dep kútilýde. Bul is-sharany biz óte joǵary deńgeıge ótkizýimiz tıis. Ol – bizge artylǵan negizgi mindet bolyp tabylady. Sondyqtan búgingi uıymdastyrylyp jatqan ushqyr báıgeden Qazaq World Cup jarysy Kóshpendiler oıyndaryna daıyndyǵymyz dep bilemin»,- dedi Sársen Abaıuly.
Al, QR Ulttyq sport qaýymdastyǵynyń prezıdenti Islambek Saljanov jarystyń mańyzdylyǵyna toqtaldy.
«Jalpy, at báıgesi qazaq dalasynda erteden jalǵasyp kele jatqan ulttyq sport túrleriniń biri ekeni barshamyzǵa belgili. Búginde báıge sporty qanatyn keńge jaıyp, buqaralyq sıpatqa ıe bolyp otyr. Búgingi tańda ulttyq sportymyzdyń damýy, onyń álemge nasıhattalýy Memleket basshysy Qasym-Jomart Toqaevtyń jiti nazarynda. Atbegilik – atadan qalǵan kásip ári óner. Qazirgi tańda jastarymyzdyń arasynda taı jaratyp, jylqy baptaýǵa den qoıǵandar qatary kóbeıip jatqanyna óz basym óte qýanyshtymyn! Osyndaı dodalar arqyly biz álemdik arenalarǵa shyǵatynymyzǵa senimdimin!» - dedi Islambek Tóleıbaıuly.
Aıta keteıik, báıge jeńimpazdary Kýbokpen jáne qomaqty júldelermen marapattaldy. Odan bólek, kórermender arasynda «Eń úzdik ulttyq kıim», arqan tartý, qyz qýý, asyq atý syndy oıyndardan saıystar ótip, sońy elimizge tanymal óner juldyzdardyń qatysýymen konserttik baǵdarlamaǵa ulasty.