Qytaılyq shahmatshy Dın Lıjen chempıon atandy
Elordada bir aıǵa jýyq jalǵasqan shahmattan álem chempıonatynyń jabylý saltanaty boldy, dep habarlaıdy Almaty-akshamy.kz QazAqparatqa silteme jasap.
Álem chempıonatynyń túıinin qoıyp, qorytyndysyn jarıalaý úshin Premer-Mınıstrdiń orynbasary Altaı Kólginov, Halyqaralyq shahmat federasıasynyń basshysy (FIDE) Arkadıı Dvorkovıch jáne Qazaqstan shahmat federasıasynyń prezıdenti Tımýr Týrlov sahnaǵa kóterildi.
Arkadıı Dvorkovıch osy týrnırde álem chempıony atanǵan qytaılyq Dın Lıjendi marapattar aldynda aqtyq saıysqa shyqqan qos shahmatshynyń ıyǵyna shapan jabyldy.
«Sizderdi osyndaı ıgi sharada jolyqtyrǵanymyzǵa qýanyp turmyn. Shahmattan álem chempıonaty elimizdiń bas qalasy Astanada ótkenin maqtan tutamyz. Aqtyq synda óte tartysty, qyzyq oıyn kórdik. Árıne, oǵan deıingi oıyndar da asa tartysty boldy. Bizdiń elde ótken chempıonat tarıhı oqıǵamen este qalyp jatyr. Óıtkeni jańa chempıonnyń esimi belgili boldy. Dın Lıjen myrzany osy úlken jetistigimen quttyqtaımyz. Sondaı-aq, Ian myrzaǵa bolashaqta úlken jeńister tileımin», - dedi Altaı Kólginov quttyqtaý sózinde.
Sonymen qatar, búgin Halyqaralyq Shahmat federasıasynyń prezıdenti Arkadıı Dvorkovıch pen Qazaqstan shahmat federasıasynyń prezıdenti Tımýr Týrlov jalpy bilim beretin mektepter arasynda alǵashqy álem chempıonatyn ótkizý týraly shartqa qol qoıdy.
Uıymdastyrýshylardyń aıtýynsha, mundaı chempıonat álemde alǵash ret ótkizilmek.
Al oǵan kánigi sportshy sanalatyn shahmat klýbtary men úıirmelerdiń tárbıelenýshileri emes, qarapaıym oqýshylar, ıaǵnı, áýesqoı shahmatshylar qatysady.
Astanada eresekter arasynda ótken álem chempıonatynyń aqtyq oıynynda qytaılyq shahmatshy Dın Lıjen reseılik Ian Nepomnáshııdi jeńip, 17-shi álem chempıony atandy.
Klasıkalyq ýaqyt ólshemindegi 14 partıa 7:7 esebimen teń aıaqtalsa, 4 blıs-partıanyń aqyrǵy aıqasynda qytaılyq shahmatshy Reseı shahmatshysynan myqty ekenin dáleldep berdi.
Aıta ketý kerek, Dın Lıjen osy týrnırge qatysýdan bas tartqan 16-shy álem chempıony Magnýs Karlsenniń ornyna jańa chempıon bolyp tirkeldi.
Astanadaǵy chempıonattyń jalpy júlde qory 2 mln eýro bolsa, sonyń 55% Qytaı shahmatshysynyń qanjyǵasynda ketti.