Arýlap jerlenip, ardaqtap kómilmegender jer betine qaıta shyqty. 1,5 metr tereńdikten tabylǵan súıekterdiń barlyǵy repressıa jyldarynda jazyqsyz oqqa ushqandarǵa tıesili. Aýmaqta tek adam súıegi emes, atý jazasyna kesilgenderdiń jeke quraldary da anyqtalyp jatqan kórinedi, dep habarlaıdy Almaty-akshamy.kz.
Almaty oblysyna qarasty Jańalyq aýylynda adam súıekteri buǵan deıin de birneshe márte tabylǵan edi. Kóbine sý tartyp, qubyr júrgizgende shyǵatyn tarıhı materıaldar bıyl birinshi ret qana memlekettik joba aıasynda zerttelip otyr. Al 14 kúnniń ishinde 15 shaqty adamnyń denesi shyqqan aýylda arheologtar áli de 4 myńnan asa súıek jatýy múmkin, - dep jazdy Almaty.tv.
Súıekterden bólek, altyn tis, túımeler, kıim men aıaq kıim bólikterin de kózben kórip, qolmen ustadyq. Tabylǵan jádigerdiń kóbi jaqsy saqtalypty. Tek adam súıekteri bir kezde kóshede júrgizilgen jóndeý jumystary kezinde búlingendikten, kóbine shashyrap ketken.
Bul basylym bóligi 1934-54 jyldary shyqqan «Stalın joly» gazetine tıesili eken. Qarip tanyp, gazet oqyǵanyna qarap, tarıhshylar bul mańda bilimdar adamdardyń atylýy múmkin deıdi. Basqa derekter de osy boljamǵa ákep tirep tur.
«Krımınalısik, sottyq-antropologıalyq taldaý sekildi ǵylymı jumystardy júzege asyrady. Al úshinshi kezeńde osy tabylǵan súıek qaldyqtaryna DNQ analızin jasaýǵa Almatydaǵy genetıka ınstıtýty men Vılnús qalasyndaǵy genetıka ınstıtýty atsalysady», – dedi tarıh ǵylymdarynyń doktory, profesor Dosbol Baıǵunaqov.
Tabylǵan materıaldardyń ishinde áıel adamǵa tıesili zattar da bar. Al denelerdiń kóbi 1,5 metrden-aq jer betine shyǵyp jatqan kórinedi. Soǵan qaraǵanda, adamdardy arnaıylap jerlemegen, tek atqan soń kóme salǵan degen boljam bar.