Qujat 27 maýsymǵa deıin qoǵamdyq talqylaýda bolady.
Qonaev qalasynyń 2050 jylǵa deıin damytýdyń bas jospary jobasynda halyqaralyq áýejaı men munaı óńdeý zaýytyn salý jospary kórsetilgen. Bul týraly Almaty oblysynyń ákimdigi «Ashyq NQA» portalynda jarıalady.
Jobalyq kezeńde Qonaev qalasyn damytýǵa arnalǵan ınvestısıalar barlyǵy 4 070 870,47 mln teńgeni quraıdy.
«Jobada qaladaǵy «halyqaralyq tranzıttik júk-jolaýshylar áýejaıynyń qurylysy» jáne «munaı óńdeý zaýyty qurylysy» jobasyn iske asyrý usynylady. Sondaı-aq, jobalyq qýaty 550 tósek-oryn bolatyn qalalyq kópbeıindi aýrýhana ǵımaraty, 750 tósek-oryn bolatyn oblystyq kópbeıindi aýrýhana jáne «Jańa İle» jańa aýdanynda jobalyq qýaty 100 tósek-oryn bolatyn jańa kardıologıalyq ortalyq salý josparlanǵan», – delingen qujatta.