500-ge jýyq jumys orny qurylatyn bolady.
«Karlskrona LC AB» JSHS-niń jańa jobasy juma kúni Qonaevta Almaty oblysynyń basshylyǵymen kezdesý barysynda tanystyryldy. Kásiporynnyń bas dırektory Ýálıhan Ahmetovtiń aıtýynsha, jobanyń quny shamamen 100 mln dollardy quraıdy, dep habarlaıdy Almaty-akshamy.kz.
«Kásiporynda 500-ge jýyq jumys orny qurylatyn bolady. Paıdalanýǵa berý 2023-2024 jyldary josparlanyp otyr. Ónimniń 40%-na deıin eksporttaý josparlanýda», - delingen oblys ákiminiń baspasóz qyzmetiniń habarlamasynda.
Qazirgi ýaqytta kompanıa jer telimin izdestirýde – ónerkásip alańy úshin 10 ga jáne kompanıa qyzmetkerleri úshin turǵyn úı salý úshin qosymsha jer qajet. Sondaı-aq, kompanıa zaýyt janynan mashına jasaý salasynda joǵary bilikti kadrlardy daıarlaý boıynsha bilim berý klasterin uıymdastyrýǵa daıyn.
«Biz tek óz qajettilikterimiz úshin ǵana emes, jalpy, óńir úshin de kadrlar ázirlep shyǵaratyn ustahana bolýǵa daıynbyz. Zaýyt janynan kolej nemese ýnıversıtet qurýdy josparlap otyrmyz», - dedi Ýálıhan Ahmetov.
Oblys ákimi Marat Sultanǵazıev atap ótkendeı, joba ekonomıkalyq quramdas bóligimen qatar óńirdegi bilim berý klasterin damytý turǵysynan da qyzyqty.
Ózderińiz biletindeı, Almaty oblysynda akademıalyq qalashyq salý josparlanýda, ol túrli óndiristermen, ındýstrıalyq aımaqpen qabysýy tıis. Osyǵan baılanysty kadrlardy daıarlaýdyń teorıalyq bóligi bilim berý uıymy bazasynda, al praktıkalyq bóligi óndiriste ótetin dýaldy oqytýdy damytý basym baǵyttardyń biri bolyp tabylady. Óńir basshysy jobany odan ári pysyqtaýdy tapsyrdy.
Aıta keteıik, «Karlskrona LC AB» JSHS-sýmen jabdyqtaý, munaı-gaz, taý-ken ónerkásibi jáne atom energetıkasy salasyndaǵy sorǵy, Elektrotehnıka, blok-modýldik jáne basqa da ilespe jabdyqtardy shyǵarýǵa mamandanǵan mashına jasaý kompanıasy.