32-33 myń muǵalimniń jalaqysy 25 paıyzǵa artady.
Almaty qalasy ákiminiń orynbasary Ásem Núsipova qalalyq máslıhattyń otyrysynda kelesi jyly muǵalimder men dárigerlerdiń jalaqysy kóteriletinin aıtty, dep habarlaıdy Almaty-akshamy.kz.
«Kelesi jyly muǵalimder men medısına qyzmetkerleriniń eńbekaqy qory 170 mlrd teńgeni quraıdy. 32-33 myń muǵalimniń jalaqysy 25 paıyzǵa artady, bul úshin qala búdjetinen 73 mıllıard teńge qarastyrylǵan. 2022 jyly muǵalimderdiń ortasha jalaqysy 250-255 myń teńgeni qurasa, 2023 jyly bul kórsetkish 320 myń teńgege deıin ósedi», - dedi ol.
Keler jyly kitaphanashylardyń, tehnıkalyq qyzmetkerlerdiń jáne basqa da bilim berý salasy qyzmetkerleriniń jalaqysyn 22 paıyzǵa arttyrý qarastyrylyp, oǵan 9 mıllıard teńge qarastyrylǵan.
«Biliktiligin arttyrǵanyn rastaǵan 19 myńǵa jýyq muǵalim qosymsha aqy alady. Bul úshin qosymsha 25 mlrd teńge bólindi», - dep qosty Ásem Núsipova.
Sondaı-aq ol máslıhat depýtattaryna kelesi jyly jalaqynyń kóterilýi densaýlyq saqtaý salasynyń qyzmetkerlerine de áser etetinin jetkizdi.
«Dárigerlerdiń eńbekaqysy 30 paıyzǵa, medbıkelerdiń eńbekaqysy 20 paıyzǵa, kishi medısına qyzmetkerleriniń eńbekaqysy 18 paıyzǵa artady. 2023 jyly dárigerlerdiń ortasha jalaqysy shamamen 350 myń teńgeni, medbıkelerdiki 205 myń teńgeni quraıdy», - dep túıindedi ol.