Budan buryn Ulttyq gvardıa sarbazynyń qaza bolǵanyn habarlaǵanbyz.
Almaty oblysynda qatty daýyl kezinde qaza tapqan qatardaǵy jaýynger Almas Shahımov memlekettik nagradaǵa usynyldy, dep habarlaıdy Almaty-akshamy.kz
Dalalyq oqý-jattyǵý kezinde qaza tapqan jaýyngerdi marapattaý týraly usynys bas qolbasshylyqqa jiberilgen. Qaı nagradamen marapattalatyny sheshiledi.
Marqumnyń denesi týǵan jeri - Kókshetaý qalasyna jiberiledi. Al otbasyna materıaldyq kómek kórsetiledi.
Aıta keteri, 5571 áskerı bóliminiń jaýyngerlik daıarlyq josparyna sáıkes, jedel maqsattaǵy 1-batalonnyń jeke quramy 8-13 tamyz aralyǵynda dalalyq oqý-jattyǵýǵa shyqqan.
9 tamyzda saǵat 20.55 shamasynda qatty daýyl bastalyp, jel soǵyp, tigilgen shatyrlar qıraı bastaǵan. Qatardaǵy jaýynger Almas Shahımov áriptesterin qaýipsiz jerge evakýasıalaýǵa kómektesip júrgen. Sol kezde shatyrdyń metal jaqtaýyna basyn soǵyp, jaraqat alǵan. Oǵan medısınalyq kómek kórsetilip, jaýynger Qonaev qalasyndaǵy aýrýhanaǵa jetkizilgen. Biraq aýrýhanada qaıtys boldy.
«Óziniń janqıarlyq is-áreketterimen qatardaǵy jaýynger A.N.Shahımov joldastaryn qutqaryp qaldy. Alaıda ózi basynan aýyr jaraqat aldy», - delingen resmı habarlamada.
Oqıǵanyń mán-jaıy anyqtalýda, qyzmettik tergeý bastaldy. Daýyl kezinde taǵy 14 áskerı jaraqat alǵan. Qazirgi kezde barlyǵy sapqa qaıta oralǵan.