Ekonormany buzǵan júrgizýshige eskertý nemese 10 AEK (30 630 teńge) kóleminde aıyppul salady.
Qalalyq ekologıa jáne qorshaǵan ortany qorǵaý basqarmasy Avtokólik quraldarynan shyǵatyn zıan zattardy ólsheý erejesin ázirledi, dep habarlaıdy Almaty-akshamy.kz
Erejede Almaty qalasyndaǵy stasıonarlyq jáne jyljymaly ekologıalyq posttardyń tolyqqandy jumys isteýi úshin qajet jumystyń tolyq kesheni, sonymen qatar avtokólik quraldarynyń paıdalanylǵan gazyndaǵy retteletin lastaýshy zattardyń tizbesi qamtylǵan. Stasıonarlyq ekologıalyq beketter jyl boıyna táýlik boıy úzdiksiz jumys isteıdi.
Stasıonarlyq jáne jyljymaly posttarda ólshenetin kólikterdiń sany kúnine keminde 500 birlik bolady dep josparlanyp otyr. Atap aıtqanda, paıdalanylǵan gaz ólshenedi.
Avtokólik quraldaryn toqtatýdyń basymdylyǵy:
Almaty qalasy polısıa departamentiniń jedel baǵyty;
ýákiletti organnyń habarlamasy;
jol baqylaý kameralarymen, onyń ishinde Sergek júıesimen berilgen derekter;
avtokólik quraldaryn vızýaldy baqylaý (syrtqy túri) boıynsha;
joldan synama alý.
Erejege sáıkes, polısıa qyzmetkeri taıaqshamen avtokólikti toqtatady. Kólikti toqtatqannan keıin júrgizýshige jaqyndap, ózin tanystyryp, toqtaý sebebin túsindiredi.
Óz kezeginde esepke alý mamany paıdalanylǵan gazdardy ólsheıdi jáne alynǵan málimetter negizinde avtomatty túrde elektrondy ólsheý hattamasyn jasaıdy jáne ony saqtaý úshin derekter bazasyna beredi. Kólik ekologıalyq standarttarǵa saı bolsa, júrgizýshi qozǵalysyn jalǵastyrady.
Paıdalanylǵan gazdardyń ekologıalyq normasynan asyp ketkeni bastapqy anyqtalǵan kezde polısıa qyzmetkeri júrgizýshige eskertý nemese 10 AEK (30 630 teńge) kóleminde aıyppul salady.
Osydan keıin júrgizýshi 10 jumys kúninde kólikti ekologıalyq normalarǵa sáıkestendirip, baqylaý ólsheýi úshin ekologıalyq beketke kelýi kerek. Paıdalanylǵan gazdyń ekologıalyq normasynan birneshe ret asyp ketýi anyqtalsa, júrgizýshige 20 AEK (61 260 teńge) kóleminde aıyppul salynady.
Bul rette aqaýy bar kólik aıyppul tólengenge deıin qamaý alańyna jiberiledi, aıyppul tólengennen keıin júrgizýshige kólikti qalypty jaǵdaıǵa keltirý úshin 10 jumys kúni beriledi.
Stasıonarlyq ekologıalyq posttar bıiktigi keminde 4,5 metr jáne uzyndyǵy 2,5 metr shatyrmen, jumys bólmesimen, kompúterler, beınebaqylaý júıeleri jıhazdar, turmystyq bólme, vana, jumys bólmesi, syrtqy jáne ishki jaryqtandyrýmen, kondısıonerlermen, jylytý júıelerimen jabdyqtalýy kerek.
Ereje sonymen qatar avtokóliktiń paıdalanǵan gazyn ólsheý ádistemesin jáne tehnıkalyq talaptardy anyqtaıdy. Qujat 23 tamyzǵa deıin qoǵamdyq talqylaý úshin Ashyq NQA veb-saıtynda jarıalanǵan.