Olardyń kólikteri aıyp turaǵyna qoıyldy.
«Qorǵaý – Qaýipti júrgizýshi» júıesi 9 mln teńgege jýyq qarjyǵa jol qozǵalysy erejesin buzǵan 8 júrgizýshini anyqtady, dep habarlaıdy Almaty-akshamy.kz Polisia.kz-ke silteme jasap.
Almaty polısıasynyń aldyńǵy sheptegi bólimsheleri jol qaýipsizdigin qamtamasyz etý maqsatynda aldyn alý is-sharalaryn júrgizýde. Kólik quraldaryna jalǵan memlekettik tirkeý nómirlik belgilerin ornatqan, sondaı-aq jol qozǵalysy erejelerin júıeli túrde buzyp, aıyppul tóleýden jaltaryp júrgen kólikterdi anyqtaýǵa erekshe nazar aýdarylýda.
Jalǵan nómirlik belgi taqqan jáne kólik quralyn basqarý quqyǵynan aıyrylǵan, sondaı-aq jol qozǵalysy erejelerin júıeli túrde buzyp, iri kólemde qaryzy bar kólikterdiń tizimderi jasaqtaldy.
Sonymen qatar, polıseıler quqyq buzýshylyqty anyqtaýdyń elektrondyq júıesi «Sergek» pen «Qorǵaý – qaýipti júrgizýshi» qosymshasy arqyly jol qozǵalysy jaǵdaıyn baqylaýda.
Tek osy aıdyń basynan beri jol qaýipsizdigi salasynda 4 342 quqyq buzýshylyq anyqtaldy jáne kólikti mas kúıinde basqarǵan 44 júrgizýshi ustaldy. Avtomattandyrylǵan aqparattyq baqylaý júıesiniń kómegimen 716 avtokólik anyqtaldy jáne ustaldy, onyń 46-sy jalǵan tirkeý nómirimen, 220-sy saqtandyrý polısinsiz, 397-si tehnıkalyq baqylaýdan ótpegen, 47-si memlekettik nómirsiz.
Sonymen qatar, buryn sot sheshimimen kólik quraldaryn basqarý quqyǵynan aıyrylǵan 7 júrgizýshi ustaldy. Tártip buzýshylar ákimshilik jaýapkershilikke tartylyp, 62 avtokólik mamandandyrylǵan turaqqa ornalastyryldy.
Sondaı-aq, jol erejesin júıeli túrde buzyp, aıyppul tóleýden jaltaryp júrgen júrgizýshilerdi anyqtaý jumystary da júrgizilýde. Aı basynan beri 9 mln teńgege jýyq aıyppulmen JQE buzǵan 8 júrgizýshi ustaldy.