Úkimet Almaty oblysy, Kegen aýdanynyń Jalaǵash aýylynda sport keshenin salýǵa 1,1 mlrd teńge bóldi. Joba «Zańsyz ıemdenilgen aktıvterdi memleketke qaıtarý týraly» Zań aıasynda iske asyrylyp otyr, dep habarlaıdy aqshamnews.kz
Prezıdenttiń tapsyrmasyna sáıkes, Arnaýly memlekettik qordan alynǵan qarajat óńirlerdegi áleýmettik mańyzy bar nysandardyń qurylysyna baǵyttalýda.
Jańa sport kesheni dene shynyqtyrý daıyndyǵy boıynsha oqý-jattyǵý sabaqtaryn ótkizýge jáne jarystar uıymdastyrýǵa arnalǵan. Keshende boks, kúres jáne basqa da sport túrlerine arnalǵan birneshe zaldar qarastyrylǵan.
2024 jyly elimizde 90 dene shynyqtyrý-saýyqtyrý kesheni salyndy, olardyń basym bóligi aýyldyq jerlerde ornalasqan. Sonymen qatar, Úkimet 2025 jyldyń sońyna deıin 113 jańa sport nysanyn salý jáne 26 sport mekemesin rekonstrýksıalaýdy josparlaýda.
Búgingi tańda Arnaýly memlekettik qordan áleýmettik mańyzy bar nysandardy salýǵa shamamen 50,6 mlrd teńge bólindi. Bul qarajat esebinen 4 mektep, onyń ishinde mýzykalyq mektep, sport kesheni, kópsalaly aýrýhana, jataqhana jáne 2 balabaqsha salynýda.
«Zańsyz ıemdenilgen aktıvterdi memleketke qaıtarý týraly» Zań negizinde Arqalyq, Astana, Almaty qalalarynda áleýmettik ınfraqurylym nysandarynyń qurylysy jalǵasýda.