Osydan tórt jyl buryn Salyq kodeksinde ortaq ıpotekaǵa arnalǵan salyq shegerimderiniń kúshine enýi 2025 jylǵa deıin keıinge qaldyrylǵan bolatyn. Ol ýaqytta shegerim tek turǵyn úı qurylys jınaq júıesi boıynsha jumys istep turdy. Endi, 2025 jyldyń 1 qańtarynan beri shegerim barlyq ıpotekany qamtıdy. Onyń ishinde "7-20-25" pen "Baspana hıt" ıpotekalary da bar.
Shegerim sizge aılyqtan tólenetin jeke tabys salyq mólsherin qysqartyp, qolyńyzǵa kóbirek jalaqy alýǵa múmkindik beredi. Sál de bolsa únemdeısiz.
Aı saıyn ıpotekaǵa tóleıtin somanyń ishindegi bank prosenti osy shegerim ishine kiredi. Mysaly, sizdiń jalaqyńyz (oklad) 400 000 teńgeni quraıdy deıik. Odan alynatyn zeınataqy jarnasyn esepteıik: 400 000 / 10% = 40 000 teńge. Al sizden alynatyn jeke tabys salyǵy bylaı eseptelinedi: (Jalaqy – zeınetaqy jarnasy – 1 tómengi aılyq kórsetkish) / 10%. Tıisinshe ol (400 000 – 40 000 – 85 000) / 10% = 27 500 teńge. Sonda 400 myń teńge aılyǵyńyz bolsa, siz: 27 500 teńge tabys salyǵyn (IPN) tóleısiz, 40 000 teńge zeınetaqy qoryna ketedi, 8 000 teńge OSMS alynady. Qolyńyzǵa tıetini — 324 500 teńge.
Endi, eger siz aı saıyn ıpoteka tólep otyrsańyz, salyq shegerimderi arqyly qandaı soma únemdeıtinińizdi eseptep kóreıik. Mysaly, siz 4 jyl buryn «7-20-25» ıpotekasyn alǵansyz. Qazir tólep júrsiz deıik: Páter quny — 20 000 000 teńge Alǵashqy jarna — 20% — 4 000 000 teńge Nesıe mólsheri - 16 000 000 teńge Tólem tıpi - anýıtet Prosenti - 7% Nesıe merzimi — 15 jyl. Aıyna tóleıtin ıpotekańyz 143 800 teńge. Onyń ishinde shamamen qazirgi ýaqytta (180 aıdyń 60 aıy ótkennen keıin) bank prosenti 72 000 teńgedeı bolýy kerek. Aı saıyn ol shamamen 450 teńgege azaıyp otyrady. Endi salyq shegerimin iske qossaq, qansha soma únemdeımiz? Oklad – zeınataqy jarnasy – 1 tómengi aılyq kórsetkish — OSMS — (aı saıynǵy ıpotekalyq tólemniń ishindegi bank syıaqysy) / 10%, demek (400 000 – 40 000 – 85 000 – 8 000 - 72 000) / 10% = 19 500 teńge. Bul biz tóleıtin jeke tabys salyǵy. Onyń aldyndaǵy 27 500 salyqqa qaraǵanda 8 000 teńgege az. Demek qolymyzǵa endi 332 500 teńge tıip otyrady. Shegerimge deıin qolǵa 324 500 alyp kelgen edik. Sonymen, eger ıpotekalyq shegerimderdi iske qossaq, onda biz aıyna dál qazir 8 000 teńgedeı únemdeımiz.
Biraq aı saıyn bank syıaqysy 450 teńgege azaıyp otyratynyn eskersek, bizdiń únemdeýimiz de aı saıyn shamamen 45 teńgege qysqaryp otyrady. Eger siz resmı bir jerde jumys istep, aılyq alatyn bolsańyz jáne "7-20-25" nemese "Baspana hıt" ıpotekasy tólep júrseńiz, osy qaryz kelisimshartyn, onyń ishindegi grafıkti birge alyp, óz býhgalterıańyzǵa baryńyz. Onda salyq shegerimine ótinish jazasyz. Býhgalterińiz sizge aı saıyn shegerim eseptep otyratyn bolady.