2024 jyly Almaty oblysynyń dıqandary 49,1 myń gektar jerge júgeri egip, tolyq ónim jınady.
Ortasha ónimdilik gektarynan 55 sentnerdi qurap, jalpy 270,7 myń tonna ónim alyndy. Bul – óńirdiń sońǵy jyldardaǵy eń jaqsy kórsetkishteriniń biri, dep habarlaıdy aqshamnews.kz.
Jınalǵan ónimniń negizgi bóligi (175 myń tonna) mal azyǵyna baǵyttaldy, taǵy 94 myń tonna óńdeýge jiberildi, al 1,3 myń tonnasy kelesi jylǵy egý jumystaryna qaldyryldy. Negizgi óńdeýshiler «Jarkent krahmal-patoka zaýyty» (78 myń tonna), «AzıaAgroFýd» (60 myń tonna) jáne «Kók Teńiz» (14 myń tonna). Júgeriniń ortasha satyp alý baǵasy tonnasyna 55-60 myń teńge bolsa, qus fabrıkalary ony kılogramyna 74 teńgeden satyp aldy.
Aýyl sharýashylyǵy óndirýshilerin qoldaý maqsatynda óńirde júgeri óńdeý sýbsıdıalanady. 2024 jyly bul maqsatqa 1,5 mlrd teńge bólinip, fermerlerge óńdeýge tapsyrylǵan ár tonna úshin 18 myń teńgeden ótemaqy berildi. Oblysta 102,6 myń tonna astyq saqtaı alatyn úsh lısenzıalanǵan qoıma jumys isteıdi.
Almaty oblysynda júgeri óndirisiniń turaqty ósýi – durys júrgizilgen agrarlyq saıasattyń, fermerlerdi qoldaýdyń jáne zamanaýı tehnologıalardy engizýdiń nátıjesi. Óńir eldegi basty astyq óndirýshilerdiń biri bolyp qala beredi. Al kelesi jyly biz egistik alqaptaryn ulǵaıtýdy josparlap otyrmyz, – dep atap ótti oblys ákimdigi.
2025 jyly júgeri egistik alqaptary 52,6 myń gektarǵa deıin ulǵaıtylady, byltyrǵy jylmen salystyrǵanda 3,5 myń gektarǵa artyq. Bul óńirdiń eldegi astyq naryǵyndaǵy ornyn odan ári nyǵaıtýǵa múmkindik beredi.