Jobanyń jalpy quny - 37,4 mlrd teńge.
«Samuryq-Energo» AQ baspasóz qyzmetiniń málimeti boıynsha, stansıa jylyna 225,7 mln. kVts elektr energıasyn óndiretin bolady, dep habarlaıdy Almaty-akshamy.kz
Almaty qalasynan 140 shaqyrym jerde salynyp jatqan qýaty 60 MVt jańa jel elektr stansıasy (JES) osy jyldyń tamyz aıynyń basynda paıdalanýǵa beriledi.
«JES salý jáne iske qosý parnıktik gazdar shyǵaryndylaryn 206 myń tonnaǵa deıin azaıtýǵa múmkindik beredi, sondaı-aq jylyna shamamen 89 myń tonna dástúrli otynnyń ornyn basady», - deıdi kompanıa.
Energetıkalyq nysan Almaty oblysynyń Eńbekshiqazaq aýdanynda Shelekte salynyp jatyr. Munda jeldiń ortasha jyldyq jyldamdyǵy 50 metr bıiktikte sekýndyna 7,8 metr eken, al aǵynnyń tyǵyzdyǵy - 310 Vt/m2. Bolashaqta JES qýatyn 300 MVt-qa deıin arttyrý josparlanýda. Jobanyń jalpy quny 37,4 mlrd teńge. Jobany «Samuryq-Energo» AQ qazaqstandyq elektr energetıkalyq holdıńi Power China qytaı korporasıasymen seriktestikte iske asyrýda.
Almaty qalasy men oblysynda jumys istep turǵan Almaty JEO, Qapshaǵaı jáne Almatyda Kaskad GES, Jambyl GRES, sondaı-aq Esik, Moınaq, Qataral, Taldyqorǵan GES-terine qaramastan, bul óńirde energıa tapshylyǵy bar.
Óıtkeni elimizdiń eń iri megapolısi ornalasqan oblystaǵy óndirýshi kúshter mundaǵy elektr qýatyna degen suranystyń tek 50% óteıdi. Tapshylyq syrtqy energıa óndirýshiler (respýblıkanyń soltústik oblystarynan, Jambyl GRES jáne Qyrǵyzstannan) esebinen jabylady.