Oǵan qosa esirtkini jarnamalaıtyn 450 saıtty buǵattaldy.
Almatyda esirtkini jarnamalaǵan bes myń graffıtı-jazbalar boıaldy, dep habarlaıdy Almaty-akshamy.kz İİM aqparattyq portalyna silteme jasap.
Almaty qalalyq PD basshysy halyq aldyndaǵy esep berý kezdesýinde 380 keli esirtki, onyń ishinde 15 keli sıntetıkalyq esirtki tárkilenip, zańsyz aınalymǵa jiberilmegenin aıtty.
«Biz sıntetıkalyq esirtkilerdi shyǵaratyn úsh esirtki zerthanasyn joıdyq. Internet-resýrstar arqyly sıntetıkalyq mefedron esirtki zatyn daıyndaý jáne satýmen aınalysqan esirtki bıznesi salasyndaǵy eki uıymdasqan qylmystyq toptyń áreketiniń joly kesildi. Bıylǵy jyldyń basynan beri taǵy bir esirtki zerthanasyn anyqtadyq, onda 150 mıllıon teńgeniń esirtki shıkizaty tárkilendi», – dedi Qanat Taımerdenov.
Eriktiler men belsendi azamattardyń arqasynda esirtkiniń taralýy týraly aqparaty bar bes myń graffıtı-jazbalar boıaldy. Esirtki satatyn 450 ınternet-saıt buǵattaldy. «Sonymen qatar, qalanyń oqý oryndarynda da esirtkige qarsy taqyryptar boıynsha 260 profılaktıkalyq is-shara júrgizildi. Osy jyly da bul baǵyttaǵy barlyq is-sharalar jalǵasyn tabady jáne erekshe baqylaýda bolady», – dedi Qanat Taımerdenov.