Osy aıda Almaty oblysynyń polıseıleri birneshe mal urlyǵy boıynsha úsh qylmystyq topty quryqtady.
Jedel-izdestirý sharalarynyń nátıjesinde 10 adam anyqtalyp, ustaldy. Olardyń toǵyzy ýaqytsha ustaý ızolátoryna qamaldy. Polısıanyń málimetinshe, sońǵy operasıa 22 aqpanda ótti, dep habarlaıdy aqshamnews.kz Polisia.kz-ke silteme jasap.
Uzynaǵash aýylynyń turǵyny polısıaǵa aryzdanǵan, onyń qorasynan bes jylqy urlanǵan. Keltirilgen shyǵyn 5 mıllıon teńge shamasynda boldy. Jedel-izdestirý sharalary barysynda 32 jáne 34 jastaǵy eki kúdikti ustaldy, olar qamaýǵa alynyp, urlanǵan mal ıesine qaıtaryldy.
Sonymen qatar Kegen aýdanynda 35 jastaǵy jergilikti turǵynnyń jylqy urlyǵyn kásip etkeni anyqtaldy. Bul kúdikti toǵyz bas maldy urlap, úshinshi tulǵalarǵa qaıta satqan. Satyp alýshylar bul derekti rastaǵannan keıin, kúdikti óz kinásin moıyndady. Jalpy shyǵyn 4 mıllıon teńgeden asty. Jyl basynan beri Jambyl aýdanynda úsh birdeı mal urlyǵymen aınalysatyn qylmystyq top quryqtaldy, olar jasaǵan 20 qylmys epızody dáleldendi. Atalǵan qylmystardyń nátıjesinde 460 bas mal urlanǵan. Polısıa qyzmetkerleriniń jedel áreketiniń arqasynda kúdiktiler satyp úlgermegen mal tárkilenip, ıelerine qaıtaryldy. Qaıtarylǵan múliktiń jalpy quny 13 mıllıon teńgeden asty.