2024 jyly qazaqstandyqtarǵa áleýmettik-eńbek salasynda proaktıvti formatta 1,5 mln-nan astam túrli memlekettik qyzmetter kórsetildi.
Kórsetilgen qyzmetterdiń sany 2023 jylmen salystyrǵanda 200 myńǵa ósti, dep habarlaıdy aqshamnews.kz.
Proaktıvti format belgili bir ómirlik jaǵdaı týyndaǵan kezde qandaı da bir qyzmet kórsetýdiń ótinishsiz tártibin kózdeıdi. Barlyq qajetti málimetter memlekettik derekter qorynan elektrondy túrde jınalady. Ol úshin azamattarǵa eshqaıda barýdyń qajeti joq, tek SMS-habarlamaǵa jaýap berse jetkilikti.
Proaktıvti qyzmetterdiń bir bóligi Otbasynyń sıfrlyq kartasy arqyly kórsetiledi, ol avtomatty rejımde ál-aýqat deńgeıin, sondaı-aq memlekettik qoldaýdyń tıisti sharalaryn aıqyndaıdy. Ony engizýdiń arqasynda 2024 jyly 642 myńnan astam adam memlekettik qyzmetterdi proaktıvti kórsetý úshin SMS aldy. Bul rette ótinishsiz járdemaqy nemese tólem alý múmkindigin 263 myń adam paıdalandy.
2024 jylǵy aqpanda taǵy bir memlekettik qyzmet, atap aıtqanda «Múgedektigi bar balalardy úıde oqytýǵa jumsalǵan shyǵyndardy óteý» qyzmeti proaktıvti formatqa aýystyryldy.
Osylaısha, búgingi tańda proaktıvti formatta áleýmettik-eńbek salasynda 28 memlekettik qyzmet kórsetiledi. Olardyń ishindegi eń suranysqa ıeleri:
- jumyssyz azamattardy tirkeý (771 myń);
- bala týýyna jáne bala kútimi boıynsha járdemaqy taǵaıyndaý (218 myń);
- bala kútimine baılanysty tabysynan aıyrylǵan jaǵdaıda áleýmettik tólem taǵaıyndaý (172 myń);
- ınflásıa deńgeıin eskere otyryp, naqty engizilgen mindetti zeınetaqy jarnalarynyń, mindetti kásiptik zeınetaqy jarnalarynyń somasy men zeınetaqy jınaqtarynyń somasy (memlekettik kepildik) arasyndaǵy aıyrmany tóleý (177 myń);
- múgedektikti jáne/nemese eńbekke qabilettiliginen aıyrylý dárejesin belgileý jáne/nemese qajetti áleýmettik qorǵaý sharalaryn aıqyndaý (97 myń).
Sonymen birge jekelegen qyzmetterdi túrlendirý jáne jeńildetý boıynsha da jan-jaqty jumystar júrgizilýde.
Atap aıtqanda, 30 nozologıa boıynsha múgedektik tobyn belgileý úshin medısınalyq-áleýmettik saraptama júrgizýdiń syrttaı formaty boıynsha pılottyq jobany iske asyrý jalǵasýda. 2024 jyly osyndaı formatta 97 myńǵa jýyq ótinim qaraldy.
Sondaı-aq múgedektigi bar adamdarǵa Áleýmettik qyzmetter portaly arqyly tehnıkalyq quraldar men ońaltý qyzmetterin óndirýshi men jetkizýshini óz betinshe tańdaý múmkindigi qoljetimdi. 2024 jyly 1,1 mıllıonnan astam tapsyrys oryndaldy.