Bul óńirde balyq ósiretin 22 sharýashylyq bar.
Almaty oblysyndaǵy kásipkerler balyq sharýashylyǵyn damytýdy kózdep otyr. Olar jyldyń sońyna qaraı segiz myń tonna deıin balyq ósirýdi josparlap jatyr, dep habarlaıdy Almaty-akshamy.kz
«Ótken jyly Almaty oblysynda 6 myń tonna jýyq taýarly balyq ósirilse, bıyl onyń kólemin 8 myń tonnaǵa jetkizý josparlanýda. Sondaı-aq, Aral bekiresi qoldan ósiriletin bolady», - delingen Ekologıa mınıstrliginiń baspasóz qyzmetiniń habarlamasynda.
Almaty oblysynda balyq ósiretin 22 sharýashylyq bar. Solardyń biri - Marlen Tursynáli. Byltyr kásipker 50 tonna taýarly baqtaq balyǵyn ósirse, bıyl 160 tonnaǵa kóbeıtpek. Óıtkeni qazir óńirdiń Eńbekshiqazaq aýdany Esik qalasynda balyq ósiretin toǵandardy salyp jatyr. Aldaǵy eki aıda qurylys jumystary aıaqtalatynyn aıtady.
«Jylyna 220 tonna forel balyǵyn, 50 tonna bekire balyǵyn, 100 tonna afrıkalyq (klarıvı deıtin) som balyǵyn ósiremiz. Sharýashylyqtarymyzda 50-ge jýyq adam eńbek etedi. Ózderińiz kórgen jerdi ınvestısıalyq jobamen aldyq. Aldaǵy eki aıda qurylys jumystary tolyqtaı aıaqtalady. Sol kezde qýattylyǵy 120 tonna bolatyn sý toǵandarynda qosymsha taǵy da baqtaq balyǵyn ósiremiz. Ári qaraı ishki naryqqa satylymǵa shyǵaramyz», - deıdi kásipker Marlen Tursynáli.
Sonymen qatar, Shelek toǵan sharýashylyǵynda osy jyldyń sáýirinen bastap oblysta Aral bekiresi ósiriletin bolady. Eske salsaq, bul sý marjany 1996 jyly erekshe qorǵaýǵa alynyp, Qazaqstannyń «Qyzyl kitabyna» engizildi. Alaıda, Aral-Syrdarıa sý basseıinde bul balyq túri joıylyp ketken. Biraq, jersindirilgen Balqash-İle sý basseıinen aýlanady. Sóıtip, sharýashylyqta ony qoldan ári qaraı ósirýge beıimdep, ýyldyryǵy men shabaǵyn tabıǵı ortaǵa qaıtadan jiberedi. Qazir oǵan ruqsat alýy úshin sala komıteti osy aıdyń aıaǵyna deıin qaýly shyǵarýdy josparlaýda.
«Biz túrli saraptamadan ótip, aýlaýǵa ruqsat alýy úshin bıologıalyq negizdemeni Balyq sharýashylyǵy komıtetine jiberdik. Qaýly shyqqan soń sáýir aıynda tabıǵı ortadan aýlap, qolda ósirýge bıimdeımiz. Eresek analyqtardyń ýyldyryǵynan shabaqtardy shyǵaryp, qaıtadan tabıǵı ortaǵa jiberemiz. Bul óz kezeginde joıylyp bara jatqan baǵaly balyq túrin saqtap qalýǵa sep bolady», - deıdi sharýashylyq dırektorynyń orynbasary Meırambek Pazylbekov.
Almaty oblysy ózge óńirlerge qaraǵanda balyq ósirýge áleýeti joǵary. Sondyqtan bolar qoldan ósiremin degen nıet bildirýshiler kóp. Olarǵa memleket tarapynan qoldaý da az emes.
«Almaty oblysynda sý jáne jasandy sýlar kóp, tabıǵı kólder de barshylyq. Bıyl sol tabıǵı kólderdi balyq ósirý úshin bekitip, jyldyń sońyna qaraı 8 myń tonna deıin balyq ósirýge josparymyz bar. Ótken jyly Almaty oblysynyń búdjetinen taýarlyq balyq ósirýdi sýbsıdıalaýǵa 32,1 mln teńge qarajat bólindi, onyń 16,2 mln teńgesi ıgerildi. Qalǵan 15,8 mln teńge ótinish túspegendikten búdjetke keri qaıtaryldy. Bıyl oblys búdjetinen taýarlyq balyq ósirýdi sýbsıdıalaýǵa 38,0 mln teńge bólý josparlanýda», - deıdi Balqash-Alakól oblysaralyq baseındik balyq sharýashylyǵy ınspeksıasy basshysynyń orynbasary Rınat Kýmashev.
Aıta ketý qajet, ótken jyly QR Úkimetiniń qaýlysymen balyq sharýashylyǵyn damytýdyń 2021-2030 jyldarǵa arnalǵan baǵdarlamasy bekitildi. Onda atalǵan jyldar aralyǵynda qoldan ósirilgen sý marjandarynyń kólemin 270 myń tonnaǵa deıin ulǵaıtý kózdelgen.