Uzynaǵash aýylyndaǵy balabaqsha 150 balaǵa arnalǵan
Almaty oblysynyń Uzynaǵash aýylynda 150 balaǵa arnalǵan balabaqsha el ıgiligine berildi, dep habarlaıdy Almaty-akshamy.kz Almaty.tv-ge silteme jasap.
Mektepke deıingi mekemede balalarǵa arnap bar jaǵdaıdy jasaǵan. Tipti bóbekterdiń densaýlyǵy úshin tuzdy shahta da ashypty. Logoped, psıholog, mýzykant sıaqty mamandarmen qosa 24 tárbıeshi jumyspen qamtylǵan. Taekvondo, hareografıa sekildi úıirmeler de bar. Almaty oblysynda memlekettik-jekemenshik seriktestik aıasynda áleýmettik sala damyp keledi.
«Balabaqshada bizde qazirgi zaman talabyna saı montessorımen barlyq topty damytyp, oqytyp jatyrmyz. Qolymyzdan kelgenshe balalarǵa jaqsy jaǵdaı jasadyq. Barlyq oıyn alańy jańartyldy», – dedi balabaqsha dırektory Laýra Sársenbıeva.
Balabaqsha 6 jyldan beri jaldamaly ǵımaratta jumys istep kelgen. Sapaly qyzmet pen el seniminiń arqasynda mekeme keńeıip, memleketten qoldaý taýyp otyr. Jan basyna shaqqandaǵy qarjylandyrý arqyly ata-analar balalaryn bóbekjaıǵa qoljetimdi baǵamen berip keledi.
«Osy jerde meniń úsh nemerem tárbıelenip jatyr. Kishigirim ǵana balabaqsha bolatyn. Endi bıyl óte ádemi, kórnekti baqsha. Balalarǵa qolaıly. Balabaqshaǵa bararda qýana-qýana barady», – dedi ata-ana Boranshy Narbaev.