Senat pen Májilis depýtattary halyqpen aýyl sharýashylyǵy kooperatıvterin qurý máselelerin talqylaý aıasynda Almaty oblysynyń turǵyndarymen kezdesti.
Óz kezeginde aýyl sharýashylyǵy vıse-mınıstri Azat Sultanov mınıstrliktiń osy baǵyttaǵy jumysy qalaı qurylǵanyn, sondaı-aq memlekettik qoldaý kórsetýdiń jańa tetikteri týraly aıtyp berdi, dep habarlaıdy Almaty-akshamy.kz.
Keńeste ASHM basshysynyń orynbasary kooperasıa usaq óndirýshilerdiń, fermerlerdiń, sharýalardyń ortaq maqsattarǵa jetý úshin erikti birlestigi ekenin eske saldy. Mundaı birlestiktiń kooperatıv músheleriniń óziniń zańdy jáne ekonomıkalyq derbestigin saqtaýy, resýrstardy tıimdi paıdalaný, óndirilgen ónimdi tikeleı jáne deldaldarsyz turaqty ótkizý, memlekettik sýbsıdıalar alý, jeńildetilgen kredıt berý, salyq salý jáne birqatar artyqshylyqtary bar.
Sonymen qatar, 2015 jyly «Aýyl sharýashylyǵy kooperatıvteri týraly» Zańnyń qabyldanýy nátıjesinde kooperasıany damytýdaǵy negizgi kedergiler joıyldy. Mysaly, kooperatıvter komersıalyq emes toptan komersıalyq topqa aýystyryldy jáne aýyl sharýashylyǵy kooperatıvinde paıdany bólý múmkindigi paıda boldy, demokratıalylyq qaǵıdattary saqtaldy, qarjylyq sharalar men arnaıy salyq rejımin qoldaný kózdelgen jáne basqa da artyqshylar paıda boldy.
«Búgingi tańda aýyl sharýashylyǵy kooperatıvterine ózge aýyl sharýashylyǵy taýarlaryn óndirýshilermen teń jaǵdaıda, onyń ishinde jergilikti búdjet esebinen memlekettik qoldaýdyń barlyq sharalary qoljetimdi», - dep atap ótti Azat Sultanov.
Budan bólek, Investısıalyq sýbsıdıalaý qaǵıdalarynda aýyl sharýashylyǵy kooperatıvteri úshin aýyl sharýashylyǵy tehnıkalary men jabdyqtarynyń jekelegen túrleri boıynsha qunyn jergilikti búdjet qarajaty esebinen 50% -ǵa deıin sýbsıdıalaýǵa arnalǵan joǵary normatıvter kózdelgen. Salyq kodeksinde aýyl sharýashylyǵy kooperatıvteri úshin barlyq salyqtar boıynsha 70% jeńildikti kózdeıtin arnaıy salyq rejımi kózdelgen. "Báıterek" UBH "AQ enshiles uıymdary arqyly kooperatıvterge aýyl sharýashylyǵy ónimderiniń óndirisin arttyrý úshin kredıtter beriledi. Memleket basshysynyń bastamasymen elimizde aýyl turǵyndarynyń tabysyn aýyl sharýashylyǵy kooperasıasy arqyly arttyrý jónindegi «Aýyl amanaty» jobasy iske asyrylýda. 2024 jyly Almaty oblysyna 17,6 mlrd teńge bólý josparlanýda.
Óz sózinde Azat Sultanov aýyldaǵy kooperasıanyń tolyqqandy damýyna kedergi keltiretin problemalyq máselelerdi joqqa shyǵarmady. Bul fermerlerdiń kooperatıvterge degen seniminiń tómendigi, jaıylymdar men shabyndyq jerlerdiń jetispeýshiligi, normatıvtik quqyqtyq aktilerdiń jetildirilmegendigi, aýyl sharýashylyǵy ónimderi úshin ótkizý men qaıta óńdeýdiń turaqty naryǵynyń bolmaýy. Sondyqtan Aýyl sharýashylyǵy mınıstrligi kooperasıa týraly túsinikti keńinen taratý, ár eldi mekenniń mamandanýyn anyqtaý, servıstik jáne marketıńtik aýyl sharýashylyǵy kooperatıvterin damytý, óńirlik áleýmettik-kásipkerlik korporasıalardyń áleýetin paıdalaný maqsatynda aýqymdy aqparattyq jumys uıymdastyrdy.
«Jalpy, mınıstrlik aýyl sharýashylyǵy kooperasıasyn damytý úshin barlyq qajetti sharalardy qabyldaýda, sonymen qatar biz aýyldyq jerlerdegi kooperasıa qyzmetin odan ári jetildirý boıynsha usynystardy qabyldaýǵa daıynbyz», - dep túıindedi Azat Sultanov.
Aıta keteıik, jıynnan keıin depýtattar Almaty oblysynyń aýyl sharýashylyǵy taýar óndirýshilerimen kezdesip, óńirdegi birneshe kásiporyndy aralaıdy.