Qazir Japonıada izdeý-qutqarý operasıalary jalǵasyp jatyr.
Qýaty 7,6 baldyq jer silkinisinen, 62 adam qaza tapqan. Úıler qulap, ǵımarattar órtenip, joldar buzylǵan, dep habarlaıdy Almaty-akshamy.kz
Saldarynan qutqarý jumystary qıyndap otyr. Dúmpý qaıtalanýy múmkin degen qaýip áli seıilgen joq. Al sýnamı qaýpi týraly dabyl doǵaryldy. Joıqyn zilzala qurbandarynyń sany áli de ósýi múmkin. Sebebi qutqarýshylar tabıǵı apattan zardap shekken aýdandarǵa jete almaı jatyr.
«Jer silkinisinen beri 40 saǵattan astam ýaqyt ótti. Zardap shekkenderdi qutqarý úshin ýaqytpen jarysyp jatyrmyz. Búgin izdestirý-qutqarý otrádtarynyń sanyn 1000-nan 2000-ǵa deıin arttyramyz, qutqarýshy ıtterdiń sany da eki ese kóbeıedi», - deıdi Japonıa premer-mınıstri Fýmıo Kısıda.
Japonıada qýaty 7,6 baldyq zilzala dúısenbide boldy. Dúmpý oshaǵy Isıkava prefektýrasyndaǵy Noto túbeginde anyqtalǵan. Ǵımarattar qulap, joldar opyryldy. Teńizde alyp tolqyn kóterilgen. Sýnamı bıiktigi 1 metrden asty. Odan keıin laı kóshkini júrgen. Ondaǵan myń adam elektr jaryǵynsyz qaldy. 100 myńǵa jýyq turǵyn qaýipsiz jerge kóshirilip, sport zaldary men mektepterge ornalastyryldy.
«Adamdar qatty qorqyp qalǵan. Túndi uıqysyz ótkizdik. Shaǵyn dúmpýler úzdiksiz qaıtalandy», - deıdi Evakýasıa ortalyǵynyń operatoy Mısýrý Kıda.
Japonıa meteorologıa agenttiginiń málimetinshe, zilzala bolǵan óńirde dúısenbiden beri qýaty tómen 150-den asa dúmpý bolǵan. Qaýip áli seıilgen joq. Aldaǵy kúnderi magnıtýdasy 7 balǵa jýyq zilzala qaıtalanýy múmkin degen eskertý jasaldy.