Kohlearlyq ımplantasıa elimizdiń birneshe klınıkalarynda ǵana júzege asyrylady
Almaty oblysynda alǵashqy ret qulaǵy estimeıtin naýqasqa ota jasaldy, dep habarlaıdy Almaty-akshamy.kz QazAqparatqa silteme jasap.
Almaty kópsalaly klınıkalyq aýrýhanasynda kohlearlyq ımplantasıa boıynsha joǵary tehnologıalyq ota jasaldy. Mundaı hırýrgıalyq otalar eki qulaǵy da sańyraý nemese 4-dárejeli estý qabiletin joǵaltqan adamdarǵa jasalady.
«Kohlearlyq ımplantasıa» ádisi boıynsha estý júıkesiniń talshyqtaryn tikeleı elektrlik yntalandyrý arqyly ishki qulaqqa elektrodtyq júıelerdi engizedi.
Kohlearlyq ımplantasıa elimizdiń birneshe klınıkalarynda ǵana júzege asyrylady. Búgingi kúni, Almaty kópsalaly klınıkalyq aýrýhanasynyń dárigerleri medısına ǵylymdarynyń doktory, profesor, «Otorınolarıngologıa Ulttyq medısınalyq zertteý ortalyǵy» FMBÝ dırektorynyń halyqaralyq qyzmet jónindegi orynbasary Dıab Hassannyń qatysýymen ota jasap, tájirıbemen almasty.
«Master-klass aıasynda 8 ota jasaldy. Olardyń arasynda kohlearlyq ımplantasıa, endolımfa qapshyǵyn drenajdaý, tımpanoplastıka jáne ossıkýloplastıkamen sanıtarlyq operasıalar boldy. Bul eresek adamdar bolǵandyqtan, kópshiliginde qosalqy aýrýlar bar, sondyqtan dárigerler aldymen tolyq dıagnostıkadan ótken naýqastarǵa josparly túrde ota jasaýdy jón kórdi. Endi kezekte, oblys turǵyndary kópsalaly aýrýhana qabyrǵasynda estý qabiletin qalpyna keltirýge tolyq múmkindikteri bar», - dedi profesor Dıab Hassan.
«Almaty oblysy boıynsha dıspanserlik esepte qulaq aýrýlary bar, onyń ishinde estý qabiletinen aıyrylǵan 1000-nan astam naýqas tirkeýde tur. Otorınolarıngologıalyq kómek kórsetýdi arttyrý qajettiligin eskere otyryp, biz Almaty oblysynda alǵash ret kohlearlyq ımplantasıa boıynsha ota jasadyq. Buryn bizdiń naýqastarda mundaı múmkindik bolmaǵan edi, oblys turǵyndary úlken qalalardaǵy klınıkalarǵa barýǵa májbúr bolǵan.»Kohlearlyq ımplantasıa naýqastyń estý qabiletin 100% qalpyna keltirýge múmkindik beredi. Biraq bul dybys álemine qaıtýdyń tek alǵashqy qadamy, sodan keıin estý-sóıleýdi qalpyna keltirý kerek. Bizdiń maqsatymyz-Almaty oblysynyń turǵyndarymen qatar ózge de aımaq turǵyndarynyń estý qabiletin qalpyna keltirýge kómektesý», - deıdi bólimshesiniń meńgerýshisi Ásel Asqarqyzy.