Kókózek aýylynda qysymy joǵary gaz qubyry ótetindikten, 137 úı súrilmek.
Sonyń kesirinen 600 adam dalada qalýy múmkin, dep habarlaıdy Almaty-akshamy.kz
Kókózek aýylynda jańa salynyp jatqan jeke turǵyn úıler kóp. Jańadan kóship kelgender bul jer teliminiń qyzyl syzyqqa engenin jaqynda bilgen. Al zań boıynsha ondaı aýmaqqa qurylys nysany bolmaýy kerek.
"Almaty-Baıserke-Talǵar gaz magıstraliniń ekinshi tarmaǵy ótetindikten, búkil úıdi súrmek. Bul jerde múgedek otbasy, jalǵyzbasty analar, kóp balaly analar bar. Endi 137 úıde 600-den asa turǵyn bar, biz qaıda baramyz?" – dedi Kókózek aýylynyń turǵyny Janar Seıitqojaeva.
Al bul otbasy qazir páter jaldap turady. Qar erip, kún jylynsa, "úıdiń qurylysyn bastaımyn" dep qazyq qaǵyp ketipti. Qurylys materıaldaryn satyp ákelip, tasyn da túsirip qoıǵan.
"Jeltoqsan aıynda 6 sotyq jerdi 1,5 mıllıon teńgege satyp alǵanbyz. Kóktemde qurylys jumysyn bastaımyn dep oılaǵanmyn", – dedi Kókózek aýylynyń turǵyny Meıramhan Bekshetaeva.
Al aýyl ákimi "turǵyndarǵa bir jyl buryn eskerttik" dep sendirdi. Onyń aıtýynsha, joǵary qysymdy gaz qubyry ótetindikten, mańaıynda úı bolmaýy kerek.
"Qarasaı aýdany jer qatynastar bólimi tender berdi. Baǵalaýshylar osy mańaıdaǵy turǵyn úıdiń qunyn anyqtaıdy. Soǵan sáıkes shyǵyn óteledi. Al kelispese, sot arqyly júzege asyrylady. Kelisip jatqan otbasylar bar, olardyń sanyn qazir naqty aıta almaımyn. Jumys júrip jatyr", – dedi Eltaı aýyldyq okýrginiń ákimi Birjan Mahatov.
Kópshiliktiń aıtýynsha, qyzyl syzyqqa úılerden bólek, mektep pen dári-dármek shyǵaratyn zaýyt ta túsip tur. Biraq ákimdik ókilderi mekteptiń qaýipti aımaqtan alys jatqandyǵyn aıtyp otyr. Dári shyǵaratyn zaýyttyń da tek qosalqy ǵımaraty súrilmek. Al alańdaýly aýyl adamdarynyń taǵdyry tenderge qarap tur.