Qoqys polıgondarynyń basym bóligi Almatyǵa jaqyn aýdandarda anyqtaldy.
Jer seriginen túsirilgen sýretter arnaıy baǵdarlamaǵa júktelip, jańartylyp otyrady. Tek Taldyqorǵan qalasy mańynan 40-tan astam osyndaı zańsyz polıgon tabylǵan, dep habarlaıdy Almaty-akshamy.kz Qazaqstan.tv saıtyna silteme jasap.
Muny mamandar eshqaıda shyqpaı-aq, jer serigimen túsirilgen sýretterden qarap bilip otyrady. Bıyldyń ózinde 389 núkte tabylyp, 59 laýazymdy tulǵaǵa 4 mln teńgeden astam aıyppul salyndy.
"Ǵaryshtyq túsirilimder aǵymdaǵy jyldyń qarasha aıyna deıin jalǵasatyndyqtan zańsyz qoqys oryndarynyń sany áli de kóbeıýi múmkin. Osyǵan sáıkes qazirgi tańda departamentpen tıisti sharalar qabyldanýda", - dedi Almaty oblystyq ekologıa departamentiniń bas mamany Danıar Ómirbekov.
Taldyqorǵanda da jaǵdaı máz emes. 40 zańsyz polıgon anyqtaldy. Qoqysty arnaıy orynǵa tógýge eringen turǵyndar men kásiporyndar túngi ýaqytty paıdalanyp, qaldyqtardy taý qylyp úıip ketedi.
Halyq qoqysty tógedi. Ony jınaý úshin qala ákimdigi búdjetten qarjy bóledi. Jylda qaıtalanatyn jaǵdaı. Jergilikti bılik qar erip, qaıta qar jaýǵansha osyndaı jabaıylyqpen alysyp keledi.
"Bıylǵy jyly 15 mln teńge bólingen. Biraq konkýrs boıynsha 8,5 mln teńgege kelisimshart jasalǵan. Qazirgi tańda 1400 tonna qoqys shyǵarylǵan", - dedi qalalyq TÚKSH bóliminiń bas mamany Ramıl Rahymbaev.
"Qala halqynyń jaýapkershiligi oıanbaı mundaı jaǵdaı jylda qaıtalana beredi", - deıdi sala mamandary. Ol úshin tıisti zańdardy da qatańdatý qajet degen pikirde.