Paıdalanýǵa berilmegen eki nysan boıynsha qazir sot júrip jatyr.
Almaty oblysynda memlekettiń qyrýar qarajaty jumsalǵan qurylys nysandary aıaqtalmaǵan kúıi qalǵan, dep habarlaıdy Almaty-akshamy.kz
Uıǵyr aýdany. Saýyqtyrý kesheni
Uıǵyr aýdanyndaǵy saýyqtyrý kesheniniń ózine osydan tórt jyl buryn 1 mıllıard teńge bólingen. Biraq saýyqtyrý ortalyǵynyń qurylysy sol kúıi aıaqtalmaı qalǵan, al qańqasy úsh jyldan beri qańyrap tur.
«Sybaılas jemqorlyq táýekelderi kartasyn júzege asyrý aıasynda tapsyrylý merzimi keshiktirilgen, qarjy jymqyrý qaýpi bar áleýmettik nysandar qurylysyna monıtorıń júrgizilip jatyr. Onyń ishinde 2 nysan Almaty oblysynda ornalasqan. Bul – Uıǵyr aýdany Shonjy aýylyndaǵy dene shynyqtyrý-saýyqtyrý kesheniniń qurylysy jáne Raıymbek aýdany Jambyl aýylyndaǵy mádenıet úıiniń qurylysy», - dedi Almaty oblysynyń jemqorlyqqa qarsy eriktisi Kýlára Manenova.
Raıymbek aýdany. Mádenıet úıiniń qurylysy
Jalpy elimizdiń barlyq óńiri boıynsha búdjeti 2,44 trıllıon teńgeni quraıtyn, alaıda aıaqtalmaı shala qalǵan 156 nysan bar ekenin Sybaılas jemqorlyqqa qarsy agenttiktiń qyzmetkerleri anyqtaǵan.
«Saýyqtyrý kesheniniń qurylysyna 2019 jyly 1 mlrd teńgeden astam qarajat bólinip, tapsyrý merzimi 2021 jylǵy qańtarǵa belgilendi. Al mádenıet úıine 2021 jyly 474 mln teńgege jýyq qarajat bólinip, jumystardy aıaqtaý merzimi 2022 jyldyń tamyz aıyna qoıyldy. Antıkor eriktilermen birlesip osy eki nysandy jiti baqylaýda ustaıdy», - dep habarlady Almaty oblysynyń Sybaılas jemqorlyqqa qarsy qyzmeti.