Bıyl jer dúmpýi jıilep ketti.
Qazaqstan jer silkinisi kóp tirkelgen 101 eldiń ishinde 17-orynda tur, dep habarlaıdy aqshamnews.kz
Earthquakelist.org portalynyń deregi boıynsha 1 qańtardan 25 qarashaǵa deıin Qazaqstanda magnıtýdasy 4-ten joǵary 259 jer silkinisi tirkelgen.
Bul san qazaqstandyqtar sezingen silkinisterden áldeqaıda kóp kórinedi. Munyń sebebi esepteý ádistemesinde: reıtıń qurastyrýshylar el shekarasynan 300 km radıýsta bolǵan barlyq seısmıkalyq belsendilikti eskeredi.
Qazaqstanda seısmıkalyq belsendilik naqty qaýip tóndiredi. Tótenshe jaǵdaılar mınıstrliginiń Ulttyq seısmologıalyq zertteýler jáne baqylaý ortalyǵynyń dereginshe, el aýmaǵynyń 40%-ynda jer silkinisi bolýy múmkin. Bul 7 mıllıon adam turatyn 400-den astam eldi mekendi qamtıdy.
2016 jylǵy Qazaqstannyń seısmıkalyq aýdandastyrý kartasyna sáıkes, eń qaýipti aımaqtar – Almaty oblysy men Almaty qalasy. Munda dúmpý 9 balǵa jetýi múmkin. Sondaı-aq, basqa ońtústik jáne shyǵys aımaqtarda 8 baldyq silkinister qaýpi bar. 7 balǵa deıingi silkinis qaýpi joǵary aımaqtarǵa Abaı, Shyǵys Qazaqstan, Jetisý, Jambyl, Túrkistan jáne Mańǵystaý oblystary kiredi. 6 bal bolýy yqtımal jer silkinisteri Batys jáne Ortalyq Qazaqstannyń jekelegen aýmaqtarynda da bolýy múmkin.