Qazaqstanda alǵash ret Seýl tarıhy mýzeıiniń koleksıasynan 100-den astam biregeı eksponat qoıyldy. Bul eksponattardyń barlyǵy Almaty mýzeıine kelýshilerdiń nazaryna «Seýl ǵajaıyptary» kórmesinde usynyldy, dep habarlaıdy almaty-akshamy.kz. 
Eksponattar Koreıa Respýblıkasynyń tarıhyn, mádenıeti men dástúrin beıneleıdi. Odan bólek, kórmege kelýshiler XIV ǵasyrdan XIX ǵasyrǵa deıin Koreıa elin basqarǵan Choson áýletiniń kıimderi men aksesýarlaryn, turmystyq zattaryn, tarıhı qujattary men úıindegi ıntererin kóre alady.
Esterińizge sala keteıik, eki apta buryn Qazaqstanǵa Koreıa Respýblıkasynyń Prezıdenti Iýn Sok El memlekettik saparmen kelgen bolatyn. «Seýl ǵajaıyptary» kórmesi eki el arasyndaǵy mádenı yntymaqtastyqty odan ári damytý baǵytynda uıymdastyrylǵan alǵashqy birlesken mádenı joba bolyp tabylady.
«Bizdiń Qazaqstanǵa saparymyzdyń maqsaty - Koreıa Respýblıkasynyń mádenıetin kórsetý. Koreı halqynyń ǵasyrlar boıǵy tarıhymen tanystyrý úshin biregeı eksponattar alyp keldik. Bul is-shara aıasynda qazaqstandyqtardyń Seýlge kelýge degen qyzyǵýshylyǵy artady dep senemiz. Seýlge kelip, qalamyzdyń tarıhı-týrıstik oryndarmen tanysýǵa shaqyramyz», - dedi Seýl tarıhy mýzeıiniń dırektory Choı Bón Gý.
Esterińizge sala keteıik, Qazaqstan Respýblıkasy men Koreıa Respýblıkasy arasyndaǵy dıplomatıalyq qatynastardyń ornaǵanyna 30 jyl tolýyna oraı 2022 jyldyń jeltoqsanynda Seýl tarıhy mýzeıinde, ıaǵnı Koreıada Almaty mýzeıi kórme uıymdastyrǵan bolatyn.
Koreıa Respýblıkasynyń Almaty qalasyndaǵy Bas konsýly Pak Nechon «Seýl ǵajaıyptary» kórmesiniń ashylýy eki memleket arasyndaǵy jarqyn is-sharalardyń biri bolyp tabylatynyn atap ótti.
Kórme almatylyqtar men qala qonaqtary úshin 2024 jyldyń 20 tamyzyna deıin jalǵasady. Koreıa mádenıetimen tanysý úshin Qabanbaı batyr kóshesi, 132 mekenjaıynda ornalasqan Almaty mýzeıine kelińizder.