Almaty jańa jyldy jaqsy qarsy aldy. Shahar kósheleri jyldaǵydan ózgeshe bezendirilip, jasyl shyrshalar kóptep ornatylyp, aınalasyna túrli anımator beıneler oryn tepti. Bul kórinis, ásirese, jarq-jurq etken álemdi súıetin balalarǵa erekshe kóńil kúı syılady. Abaı alańyndaǵy alyp shyrsha mańynda oınap júrgen, betin aıaz súıgen baldyrǵandardyń ata-analaryn sózge tartyp, ózgergen Almaty týraly oıyn bólisýge shaqyrǵan bolatynbyz.
Imanbek MOLDAHMETULY, zeınetker: Órkenıet kóshinde
Bizdiń Naýryzbaı aýdany burynǵydan keńeıip, úlkeıip keledi. Bala sany kóp. Baıqaýymsha, bizdiń aýdanǵa mektep avtobýsy kóp bólingen. Balany mektepke aparyp, alyp qaıtatyn avtobýstardy shet el kınolarynan kórýshi edik qoı, sol órkenıet bizge de jetti. Oqýshylardyń túskenin, qaıtarda mingenin qadaǵalap otyratyn muǵalimder de bólingen eken. Qala ákimdiginiń balalar qaýipsizdigine úlken mán beretini kóńilge qonady. Bul ata-analardyń da kúndiz alańdamaı jumys isteýine jasalǵan jaǵdaı dep bilemin.
Jańyl ÁPETOVA, Halyqaralyq «Janashyr» qoǵamdyq qorynyń prezıdenti: Komúnıtı ortalyqtary oń boldy
Kósheler keńeıtildi. Ádemi, zamanaýı ǵımarttar boı kóterýde. Qalanyń bos jerlerine kóp jemis aǵashtary otyrǵyzyldy. Endi sonyń ári qaraı ósip-ónýi qadaǵalanyp otyrsa degen tilegim bar. Almatynyń barlyq segiz aýdanynda da jastardyń komıýnıtı ortalyqtary iske qosylyp, ul-qyzdarymyzdyń bos ýaqytyn tıimdi paıdalanýyna jaǵdaılar jasalǵany da qýantady. Qatty turmystyq qaldyqtar tastaýǵa arnalǵan zamanaýı konteınerler qondyryldy bıyl. Bul da qalanyń kelbetin buzbaı, ásemdigin saqtaýǵa arnalǵan qadam dep oılaımyn. Bizdiń Áýezov aýdanynda bıyl jańǵyrtý-jańartý, jóndeý jumystary kóp júrgizildi. Ásirese, «Saıran» jasandy kólin zamanaýı úlgide qaıta jasap jatqany qýantady.
Lázzat ÁMİRJANOVA,
qala turǵyny:
Biz qydyratyn jer kóp
Almaty qazir jyl sanap kórkeıýde. Bizdiń Alataý aýdanynyń aýmaǵy burynǵydan da úlkeıip, mádenıet oryndary, balalar shyǵarmashylyǵy ortalyǵy ashyldy. Aýlalardyń kórkeıgeni óz aldyna bólek áńgime. Nemerelerimmen jıi qydyramyn. Úıde anam bar. Biz qydyratyn jer kóp.
Bir úıli jan bolǵasyn, aýyrmaı-syrqamaı turmaımyz. Jýyrda ǵana bizdiń Alataý aýdanyndaǵy №23 emhana bazasynan «Úzdik tájirıbe ortalyǵy» ashyldy. Bul – Almaty boıynsha ashylǵan alǵashqy medısınalyq ortalyq. Turǵyndar men dárigerler arasyndaǵy baılanysty nyǵaıtýǵa baǵyttalǵan atalmysh joba halyqaralyq standarttarǵa negizdelgen. Munda halyqqa keshendi medısınalyq, áleýmettik jáne psıhologıalyq kómekter kórsetiledi. Almatynyń barlyq jetistigine tilekshimin.
Baqyt QANAI, júrgizýshi: «Sergek» kóptik etpeıdi
Almatyda «Sergek» beınekameralarynyń kóbeıgeni durys boldy. Kóligin jyldamdyqty asyryp júrgizetinder úshin tejeý bolǵan sıaqty bul qadam. Keıbir tanystarym «attap bassań, kamera!» dep renjip jatady. «Tártipke baǵynǵan qul bolmaıdy» demekshi, bul eń aldymen ózińizdiń de, ózgeniń de qaýipsizdigi úshin jasalǵan oń sheshim ekenin aıtyp júremin.
Aıdana ASYLBEK, bolashaq dáriger: Medısına múmkindigi joǵary
Men ázirge stýdentpin. Biraq mamandyǵyma saı medısınadaǵy tyń jańalyqtarǵa qulaq túrip júremin. Medısınalyq qyzmetterdiń sapasyn arttyrý – áleýmettik turaqtylyqtyń kepili. Ótken jazda elimizde alǵash ret «Uryq hırýrgıasy» pılottyq jobasy engizildi. Bul, eger qursaqta jatqan sharananyń damýynda kinárat bolsa, sony emdeıtin jańa ınovasıa. Bul operasıa eń alǵash zamanaýı medısınalyq apparattarmen jabdyqtalǵan Almaty klınıkasynda jasaldy. Endi bizde jylyna 150-ge deıin jatyrishilik operasıa jasaýǵa bolatyn kórinedi. Bul degenińiz, eń úlken ozyq jetistik!
Qorlan BOLATQYZY, ustaz: Kitaphana aýrasy bólek
Qazir Almaty kitaphanalarynyń kúnimen, túnimen, ıaǵnı 24/7 qaǵıdatymen jumys isteıtini unaıdy. Jastar kúndiz sabaqta, túrli ádebı-mádenı is-sharalarda bolamyz da, keshke kitaphanalarǵa barýǵa úlgermeı qalyp jatady. Qazir izdegenińniń bári ınternette tur degenmen, kitaphananyń aýrasy bólek. Alatyn aqparatyń da senimdirek. Men, máselen, Jambyl atyndaǵy jasóspirimder kitaphanasyna jıi baratynbyz. İshi sondaı jaıly, jap-jaryq, eńseli. Tynysh qana otyryp kitap oqıtyn zona bólek. Al dostaryńmen áldebir taqyrypta pikir talastyrý qajet bolsa, oǵan bólek zona arnalǵan. Eshkim eshkimge kedergi jasamaıdy. Bizge rýhanı baı urpaq kerek dep oılaımyn.
Biz tildesken turǵyndar alyp shahardyń jetistigin osylaısha tizip berdi. Árıne, qýandyq. Almatynyń jarqyn kelbeti – halqynyń ál- aýqatynyń kórsetkishi deýge de negiz bar. Almatylyqtardy Jańa jylmen quttyqtaımyz. Aldaǵy tabystyrǵa dál osylaı nıet, tilek, júrekterdi biriktirip birge jetemiz degen senimdemiz.
Áńgimelesken Nurjamal ÁLİSH
«Almaty-akshamý», №1 (6563) 7 qańtar, 2025 jyl