Qazaqstan Respýblıkasy Premer-Mınıstriniń orynbasary - Syrtqy ister mınıstri Muhtar Tileýberdi Vetnam Sosıalısik Respýblıkasyna resmı saparmen bardy.
Qazaqstannyń Syrtqy ister mınıstriniń bul elge sapary eki memleket arasynda dıplomatıalyq qatynastar ornaǵannan beri 30 jyl ishinde alǵash ret bolyp otyr. Hanoıǵa sapardyń resmı bóligi Ho Shı Mın kesenesine gúl shoqtaryn qoıý rásiminen bastaldy, dep habarlaıdy Almaty-akshamy.kz QazAqparatqa silteme jasap.
Sapardyń maqsaty – sońǵy onjyldyqtar ishinde álemdegi eń joǵary ekonomıkalyq damý qarqynymen erekshelenetin dástúrli dostas elmen seriktestik qatynastardy odan ári damytý.
M. Tileýberdi VSR Syrtqy ister mınıstri Býı Than Shonmen kelissózder ótkizip, onyń barysynda taraptar saıası, saýda-ekonomıkalyq, ınvestısıalyq jáne mádenı yntymaqtastyq máseleleriniń keń aýqymyn talqylady. Eki eldiń kópjosparly yntymaqtastyǵyna jańa serpin berýge, perspektıvada birtindep artyqshylyqty ekonomıkalyq áriptestik deńgeıine shyǵýǵa nıet bildirdi. Vetnam qazan aıynda Nur-Sultan qalasynda ótetin AÓSSHK samıtine joǵary deńgeıde qatysatynyn rastady.
Vetnam Prezıdenti Ngýen Sýan Fýkpen kezdesýde SİM basshysy Vetnamda júrgizilip jatqan reformalardyń qarqyny men sapasyn joǵary baǵalap, Qazaqstandy jańǵyrtýdyń jańa kezeńiniń mazmunymen tanystyrdy.
Eki el arasyndaǵy saıası yntymaqtastyqtyń damý dınamıkasyn eskere otyryp, M. Tileýberdi joǵary deńgeıdegi ekijaqty baılanystardyń jandanýyn jaqtady. Suhbat barysynda Ngýen Sýan Fýk Prezıdent Qasym-Jomart Toqaevtyń Vetnamǵa aldaǵy resmı saparyn mazmundy tolyqtyrý jóninde tapsyrma berdi.
Vetnam Premer-Mınıstri Fam Bın Tınmen kezdesý ekijaqty qarym-qatynastardyń ekonomıkalyq kún tártibine arnaldy. Taraptar ózara saýda men ınvestısıalardyń ósýine, ekonomıkanyń túrli sektorlarynda kooperasıany damytýǵa baǵyttalǵan maqsatty kúsh-jigerdiń qajettigin atap ótti.
Sondaı-aq, M. Tileýberdi ónerkásip jáne saýda mınıstri Ngýen Hong Dıenmen kelissózder júrgizdi, onda qyrkúıekte Hanoı qalasynda ótetin aldaǵy úkimetaralyq komısıa otyrysynyń taqyryby talqylandy.
Qazaqstan delegasıasynyń quramynda bolǵan «Astana» halyqaralyq qarjy ortalyǵynyń basqarýshysy Qaırat Kelimbetov Vetnamnyń Qarjy mınıstrliginiń, Vetnamnyń damý bankiniń, sondaı-aq POCO kompanıasynyń basshylyǵymen kezdesýler ótkizip, olardyń barysynda qarjy jáne ınvestısıalar salasyndaǵy yntymaqtastyqtyń perspektıvalyq baǵyttaryn talqylady.
Sapar aıasynda M. Tileýberdi Qazaqstanmen ınvestısıalyq yntymaqtastyq múmkindikterin zertteıtin vetnamdyq kompanıalardyń basshylarymen birqatar kezdesýler ótkizdi.
«Crystal Bay» kompanıasy dırektorlar keńesiniń tóraǵasy Ngýen Dyk Chımen áńgime barysynda týrısik saladaǵy yntymaqtastyq máseleleri talqylandy. «Duc Giant Chemicals Group» korporasıasynyń basshysy Dao Hyı Hýen hımıa ónerkásibindegi yntymaqtastyq múmkindikterine qyzyǵýshylyq tanytty.
«Thai Binh Seed» Vetnamdaǵy kúrish ósirý salasyndaǵy jetekshi ınstıtýttyń bas dırektory Chan Man Bao Vetnamda ósiriletin, az mólsherde sýarýdy qajet etetin kúrishtiń jańa sorttarynyń tıimdiligi týraly aıtty.
«Vietjet» áýe kompanıasynyń vıse-prezıdenti Ngýen Than Hýngpen Qazaqstan men Vetnam arasyndaǵy tikeleı áýe qatynasyn ashý máseleleri talqylandy. Aǵymdaǵy jyldyń qazan aıynan bastap Almaty - Náchang jáne Nur-Sultan - Náchang baǵyttary boıynsha reıster iske qosylady.