Jańa termınaldyń qurylysy talqylandy
Almaty ákimi Erbolat Dosaevtyń TAV Airports Holding jańa bas dırektory Serkan Kaptan jáne Almaty halyqaralyq áýejaıy basshylyǵymen kezdesýi barysynda jańa termınaldyń aǵymdaǵy qurylysy boıynsha máseleler talqylandy. Taraptar budan bylaı da ózara yntymaqtastyqqa daıyn ekendikterin bildirdi, dep habarlaıdy Almaty-akshamy.kz.
Jańa termınaldyń iske qosylýy jolaýshylardy ótkizý qabiletin jylyna 7 mıllıonnan 14 mıllıonǵa deıin arttyrady jáne qalanyń búkil Ortalyq Azıadaǵy transporttyq-logıstıkalyq hab retindegi pozısıasyn nyǵaıtady.
«Almaty úshin áýejaıdy damytýǵa baǵyttalǵan máseleler óte mańyzdy. Óıtkeni, áýejaı qalanyń áýe qaqpasy ári áýe alańy bolyp tabylady. Rasynda da, qalamyzdyń bolashaqta damýy áýejaıdyń jaǵdaıyna, onyń ınfraqurylymyna, servıs deńgeıi men yńǵaılylyǵyna tikeleı baılanysty. Bizde Almatynyń joǵary mártebesine laıyq barlyq halyqaralyq standarttarǵa sáıkes zamanaýı termınal bolýy tıis. Óz tarapymnan qalanyń budan bylaı da jobaǵa qoldaý bildiretinin rastaımyn», – dedi Erbolat Dosaev.
Kezdesý barysynda Almaty halyqaralyq áýejaıynyń damý perspektıvalary men sheberlik- josparlaryn jyldyń aıaǵyna deıin ázirleý jáne áýejaı aýmaǵyndaǵy transporttyq ınfraqurylymdy birlesip damytý sharalary talqylandy. Megapolıs basshysy osy qujattyń aǵymdaǵy jyldyń aıaǵyna deıin qabyldanatyn qalanyń bas josparymen sáıkes bolýy tıis ekenin atap ótti.