Q.Sátpaev atyndaǵy №56 mektepte qarapaıym synyp ishinde Vıktor Soıdyń konserti ótken.
Bul týraly «Igla» fılminde Arhımed personajyn oınaǵan Arhımed Ysqaqov óz estelikterinde baıandaıdy:
- Ol kezde men mektepte muǵalim bolyp istep júrgem. Bul týraly jasyrý múmkin bolmaǵan soń, balalar menen «Sizdiń Vıktor Soıdyń fılmine túsip jatqanyńyz ras pa?» - dep surady. Men: «Ras», -dedim. – «Ol kisiden bizdiń mektepke kelýin suraýǵa bola ma?» - dedi. Men: «Ol jaǵyn bilmeımin, Vıktordan surap kóreıin, múmkin, kelip te qalar», - dedim.
Vıktorǵa: «Sen meniń mektep jumys isteıtinimdi bilesiń ǵoı?» - dedim. Ol: «Iá», - dedi.
«Meniń oqýshylarym seniń mektepke kelgenińdi qalaıdy, jalpy, bul múmkin be álde joq pa?» - dep edim, ol: «Árıne, onyń esh qıyndyǵy joq, tek biz myna jerden kesh bosaımyz, keshki toǵyzdyń ýaqyty kesh bolmasa, sol ýaqytta baraıyn», - dedi. Men balalarǵa telefon soǵyp aıttym, kesh bolyp ketpese, toǵyzdan keıin baratyn boldyq.
Jumys kúni aıaqtalǵan soń, biz meniń úıime soǵyp, gıtara alyp, onymen 56-shy mektepke keldik. Klastyń ishi meniń oqýshylaryma lyq toldy, Vıktor synyp ishine kirip kelgen kezde, oqýshylarym sileıip qatty da qaldy. Olardyń mundaı túrlerin birinshi ret kórdim. Eshqaısysy qybyr etpedi. Balalardyń ań-tań bolǵany sonshalyq, eki saǵat boıy án aıtqan Vıktor olardy oryndarynan qozǵap, «oıatýǵa» barynsha tyrysty, biraq olar tipti Soımen amandasýǵa da jaramady. Vıktorǵa eki metr jaqyn otyrǵan balalar sol sileıgen kúıi qatty da qaldy.
Kelesi kúni men Vıktordan keshirim suradym. Oǵan: «Keshe balalarǵa ne bolǵanyn bilmeımin», - dedim. Synypqa kelgenimde, janyma jaqyndaǵan balalar: «Sizden keshirim suraımyz, keshe bizge ne bolǵanyn bilmeımiz. Melshıdik te qaldyq. Vıktordan onyń taǵy bir ret kelýin ótinýge bola ma?» - dedi. Men: «Bilmeımin, taǵy surap kóreıin», - dedim. Vıktorǵa kelip: «Vıtá, balalar senen keshirim surap jatyr, múmkin, sen taǵy bir ret kelersiń?» - dedim. Ol ony esh qıyndyǵy joq ekenin aıtyp, taǵy da keshkisin jolyǵatyn boldyq.
Qarapaıym mektep synybynyń ishi júz elý adamǵa toldy, olardyń qatarynda oqýshylar, olardyń ata-analary, dostary boldy. Sol kúni olar túngi birge deıin án tyńdap, Vıktorǵa ózderiniń suraqtaryn qoıdy.
Birneshe jyl buryn Fýrmanov (Jambyl) kóshesindegi 56-shy mekteptiń tórtinshi qabatynda synyp esigine «1988 jyly osy synypta Vıktor Soıdyń eki konserti ótken» degen estelik taqtaısha ornatyldy.