4, 9 jáne 11 synyp oqýshylary úshin oqý jylynyń aıaqtalýyna oraı saltanatty is-shara ótkiziledi.
Bul aqparatty Óńirlik komýnıkasıalar qyzmetiniń alańynda Almaty qalasy bilim basqarmasy basshysynyń orynbasary Janat Aıtpaeva aıtty, dep habarlaıdy Almaty-akshamy.kz.
Ol megapolıs turǵyndaryn aldaǵy oqý jylynyń aıaqtalýy týraly habardar etti. Bıylǵy oqý jylyn 313 mektepter, 12 mektep-ınternattar jáne 85 tehnıkalyq jáne kásiptik bilim mekemeleri aıaqtaıdy. Bul mekemelerdiń barlyǵynda 400 myńnan astam oqýshylar men tárbıelenýshiler bilim alýda.
Qazaqstan Respýblıkasy Oqý-aǵartý mınıstrliginiń buıryǵyna sáıkes oqý jylynyń merzimi 2023 jyldyń 31 mamyrynda aıaqtalady.
"Sońǵy sabaq kúni barlyq mektepter bekitilgen kestege sáıkes óz sabaqtaryn júrgizedi jáne oqý kúnin synyp saǵatyn ótkizýmen aıaqtaıdy. Synyp saǵatynyń maqsaty – oqý jylyn qorytyndylaý jáne jazǵy demalys kezeńine balalardy ázirleý", - dedi Janat Aıtpaeva.
Synyp saǵattarynyń senarılerin pedagogter ár synyptyń jas erekshelikterin eskere otyryp, óz betinshe ázirleıdi. Synyp saǵatynda oqý úshin kitaptar tizimin, sondaı-aq qaraýǵa bolatyn fılmder tizimin usynyp, qaýipsizdik sharalaryn, aldyn ala josparlanyp uıymdastyrylǵan demalystyń artyqshylyqtaryn, qosymsha bilim berý uıymdaryna qatysýdyń tıimdiligin, eńbek etýdiń paıdasyn, ata-anaǵa, ata-ájelerine kómektesýdiń qajettiligin jáne jazǵy demalys kezeńindegi qaýipsizdik sharalary týraly áńgimeleý usynylady.
Synyp saǵatynda negizinen patrıotızm, otandy súıý, dostyq, tatýlyq, el tarıhyna, saıası repressıa men ashtyq qurbandarynyń esimderine qurmet tanytý taqyryptaryna basymdyq berilýi kerek
"Biz oqý jylynyń aıaqtalýy boıynsha saltanatty is-sharany ótkizýge qatysty barlyq mektep dástúrlerin qoldaı otyryp, mektepterdiń saltanatty jıyn ótkizý týraly sheshimniń derbes qabyldanatynyn habarlaımyz", - dep tolyqtyrdy qalalyq bilim basqarmasynyń ókili.
2022-2023 oqý jyly 28 myńnan astam túlek 9-synyptardy jáne 14 myńnan astam túlek 11-synyptardy bitirýde.